一周三件：宏華等肥豬肉 - 錢雋
■宏華PE僅8.8倍，平通同業，筆者認為，值博率高。
剛啱上月尾，中石化(386)宣佈喺頁岩氣勘探取得重大突破，兼將喺四川涪陵，建成第一個百億立方米頁岩氣田。該頁岩氣田由最初市場評價石頭榨唔到油，到家陣產生重大變化，而主打陸地鑽探嘅宏華(196)，正係面向嚿超級肥豬肉，有得諗。
宏華係全球最大陸地鑽探機生產商之一，總部及製造基地正正就喺四川，呢個全國頁岩氣蘊藏量no.1，兼上邊中石化打造百億立方米頁岩氣田地區，食正曬地利。又宏華有自家頁岩氣電結合開採方式，可以令總體成本慳番10%，講技術，橫掃。
能源及環保國策下，阿爺著緊非常規能源開探。十二五規劃，頁岩氣產量目標，要達到600億至1,000億立方米，係十二五65億立方米嘅15倍！若參考美國經驗，祖國要完成保守啲600億立方米目標，就需要500至700台高端鑽機。需求咁龐大，阿爺要達標，肯定要受埋私營企業玩，祖國呢個頁岩氣藍海，啖啖肉！
而宏華分到超肥豬肉前，集團到今年2月底，手頭定單已經挨近56億銀人仔，相當於上年收入80億銀人仔70%比重。又祖國媒體報道，今、明兩個月，宏華喺美國休斯敦，會有大動作，新一代高度自動化鑽機將亮相，兼且係集團「王牌」。新產品出爐，有機會幫宏華爭取定單。
估值平絕同業
專業評估，宏華今、明年度，嚟自主打業務嘅EPS 0.28港銀及0.3港銀，PE由家陣8.8倍，再跌到得番7.1倍及6.4倍。行家華油能源(1251)11.8倍、安東油田(3337)17倍，宏華平咗大截。宏華係咁意上番摩通最近所定目標價2.9元，現價(1.90元)都要翻半番，但PE仲係得9.6倍，未有耐追到行家。
錢雋
細價股專家
本欄逢周二、三、五刊出
上一則: 金手指：14 = 07之二 - 孫柏文
下一則: 板塊尋寶：識得閃一定係咁閃 - 王昇
~TITLE_S~一周兩件 - 錢雋 2014年4月15日 舊文
