慢食主義
2014年04月15日
上星期外圍股市調整，但港股相對硬朗，指數全日浮浮沉沉，最後收市不跌反升，雖然港滬直通車效應再無宣佈之日嘅威力，但似乎真係加強咗市場嘅信心，至少畀投資者多咗個中期遠景。
由總理李克強宣佈股市港滬通，家仲未有好多細節。有大行為消息降吓溫，好似摩根資產管理環球市場策略師譚慧敏就話，「滬港通」計劃對該行投資策略無大影響，但會繼續看好科技、新能源及醫療保健等板塊，而長遠AH股差價亦會收窄。
睇大局緊要過睇細節
昨日亦有消息話，北水南下可能會有限制，買家買咗股後換馬要重新排隊。對於呢類說法，陸羽仁係姑罔言之、姑罔聽之，因為今次宣佈，好多細節仲係傾緊，有無咁快拍板令人懷疑，反正你又講吓，佢又講吓，到時係點都無人記得啦，所以對於呢類消息，陸羽仁唔係咁在意。
好似港滬股市互通呢類消息，陸羽仁認為應該係睇大局而唔係睇枝節。大局係乜呢？你叫我講，就係阿爺開始為金融領域拆牆鬆綁，開始進行深度改革，至於枝節究竟係初期放幾多，點樣放，已經唔係咁重要。因為中央如果定咗大原則係放鬆，只要呢個方向訂咗落嚟，就算開始時行得慢啲，只要無事無幹，咁佢好快就會放膽行大步啲，如果投資者只係掛住低頭睇啲細嘢，咁就反而錯失咗抬頭可以睇到的風光嘞。
如睇大唔睇細呢個角度去分析，港滬股市有利資金流通，應該可以吸引各地資金聚集，但呢樣嘢唔係即食麵，咁即係話投資者對後市可以睇好少少，但唔使心急買貨，因為呢樣嘢係慢慢發生，中間個市可能仲係會上上落落，大家可以抱住有閒錢投資保值，實行「慢食主義」，買吓穩陣的指數基金或者因為政策受惠的股票，好似投資咗A股嘅國壽(2628) 呢類估值唔貴的公司。
睇番昨日大市，投資者買賣都比較小心，大市大部份時間在23000水平上好淡拉鋸整固。恒指收報23038點，升35點；國企指數收報10244點，升15點，成交金額由上周五的963億元，大縮至611億元。
「港股通」最快六個月後實施，上周五勁升11.5%的港交所(388) ，昨日繼續向上，收報149.8元，升2.6%。個別證券股亦升勢未完，第一上海(227) 三連捷，全日再升9%，報1.08元；英皇證券(717) 亦揚7%。有人話政策利好內地證券商股，但呢類股份唔平，而且估計內地證券商想喺香港插旗，好可能會收購香港同業，故此本地證券股投機價值，反而會比內地證券商股高啲啲。
萬洲上市防冷風
喺市況回穩下，被視為上半年新股重頭戲的豬肉食品企業萬洲國際(288) 準備招股。據銷售文件披露，萬洲招股價介乎8元至11.25元，入場費5682元，預測市盈率為15倍至20.8倍，集資最高411億元，較此前市傳的60億美元(約466億元)縮咗水。
雖然萬洲有點來頭，但部份業界仍擔心招股可能有遇冷危機。
現時萬洲傳有逾30位承銷商護駕，國際配售部份已經足額，但與此前重磅新股相比，各家證券行的推廣力度明顯下降。信誠證券和輝立證券分別為此輪新股預備了140億和100億元，其他經紀行未有特別預備孖展額。信誠聯席董事張智威認為，這與同行惠生國際(1340) 上市表現不盡如人意有關。
輝立證券高級企業融資主任陳英傑坦言，未知客戶反應如何，但近期半新股表現確係差強人意。
陸羽仁
金融High Tea 舊文
