智取大市：識攻識守唔係咁簡單 - 晉佳
■投資者面對唔同股市周期，要及時tune好情緒迎合市況轉變。
聰明錢由3月中開始炒上中資股，之後一個互聯互通消息，谷到港股單日千億成交，造就大戶派貨機會，令到全城資金喪接貨，卒之炒得一日就已經開始見頂散水。𠵱家乜嘢新經濟、舊經濟概念都炒爆曬，以過去咁多個股市周期嘅經驗睇，港股早已經出現轉角市，如果仲堅持用舊年嗰套進取贏錢嘅秘笈去炒股，你當初點贏，隨時就要你點輸。所以，投資者面對唔同股市周期，要學識及時tune好自己情緒，去迎合市況轉變。
追概念股策略已過時
如果心態由攻轉守，面對同一隻股票，睇法亦可以由平變貴，出現相反嘅決定絕對唔奇，更隨時喺一個浪決定埋你嘅命運。回想起舊年年尾至今年年頭，一眾概念半新股炒到癲，計估值要有咁寬鬆得咁寬鬆，否則追貨追唔落手，當時連一兩年盈利增長track record都唔使睇，就算市盈增長率1.2倍都算係抵買，10%盈利增長亦可以配得起30倍PE。不過，呢種睇法𠵱家好明顯已經唔work了。
老早跳船、最冇實力嘅手遊、支付股就唔使多講，就用隻環保股中滔環保(1363)做例子，之前出完業績後，股價升到新高6.67元，殊不知業績成為魔咒，股價唔夠一個月跌到低位4.04元，差唔多跌四成。然後周一有控股股東增持公司股份嘅消息撐住，噚日股價先反彈番半成。以噚日收市價4.45元去計估值，舊年盈利增幅26.6%，市盈率27.5倍，市盈增長率大約1倍，如果仲用之前熱戀期嘅估值，𠵱家當然仆到入去重鎚買。
不過，如果用番正常市況嘅估值方式去計，市盈增長率1倍已經唔算特別平，仲要剛剛上市唔夠一年，往績仍然欠奉，掉番轉就會覺得偏貴。由此可見，同一樣嘅基本因素，喺唔同嘅市況，絕對要有唔同嘅睇法，否則市況亢奮時唔識追，掉番轉喺氣氛轉弱時仲好亢奮咁計數，你就變咗接火棒嗰個。
留意長遠盈利可測性
至於光大國際(257)，起碼有多幾年往績可循。舊年持續經營業務盈利增長五成，但再之前兩年增幅只分別係18%同30%，同佢𠵱家市盈率31倍比較，估值尚算係合理。進行分析嘅時候，要留意長遠盈利可測性係咪真係咁高？雖然話國策支持，但係垃圾發電仲可以喺幾多個內地城市繼續擴充，嚟支持光國嘅高估值？要確定長線係咪買得過，呢啲功夫絕對唔少得。
須知道𠵱家唔會係靠概念兩個字就可以打天下嘅時候，入市要審慎啲之餘，大家功課亦都要做多啲，作戰心態亦要準備得更好。
晉佳
本欄逢周三刊登
上一則: 一周三件：五礦建設值博 - 錢雋
下一則: Follow Me：錦江資產淨值料大升 - 高彰坡
智取大市 - 晉佳 舊文
