智取大市：中國燃氣中線穩膽 - 晉佳
■如果市場開始回復理性，相信燃氣股會比較受投資者歡迎。
噚日個股反彈情況寧舍癲，簡單幾句結論係：之前彈咗嘅，噚日就唔識彈；之前未彈過嘅，噚日就大反彈。科網、濠賭板塊，噚日唔少股升到十個八個巴仙，至於之前連日反彈嘅內銀股就點曬穴。至於今日開始又點？晉佳估資金會追更落後股份，例如一批曾經熱炒過、最近又比較低沉嘅三、四線股份。
呢一種突如其來嘅單日癲市，通常有七八成機會象徵反彈接近尾聲，有兩三成機會只係一個開始。無論最後派彩係前者定後者，都會有一個追落後過程，細嘢始終會彈番轉，似乎勝算會比再追騰訊(700)、銀娛(027)呢啲大嘢高一啲。
新舊經濟股份兩個陣營分別跌過又彈過，兩極化情況已經無之前咁嚴重。晉佳唔認為新經濟股份再可以完全唔理指數死活，博命炒上破頂，主要原因係投資者理性咗，知道兩者估值差距唔可以無限放大，同時科網股催谷股價嘅招數，要用都用得幾盡。例如騰訊，之前入股京東商城，又去韓國買game玩，仲貼埋的士錢同阿里搶客，後尾去到併購都谷唔到股價，最終要用到拆細股份呢招絕招，嚟頂住業績衰過預期後股價唔好跌得咁厲害，真係乜招都出盡，股價都要跌，想像空間比起幾個月前少咗好多，冇曬遐想，股價自然要理性番啲。
股價醞釀破頂
睇嚟稍後資金唔會傾斜小量股份，反而對被遺忘嘅燃氣股有利。中國燃氣(384)噚日升4.6%，報12.68元，唔覺唔覺原來挑戰緊歷史高位。中國燃氣截至嚿年9月底止半年純利升近六成，至12.83億元，每股盈利27.41仙，收入亦升46%。年度化市盈率約23.1倍，由於下半年度業績應該保持按半年增長，所以市盈率應該更低，係少有市盈增長率低過1倍嘅增長股，難怪股價醞釀破頂。
燃氣股收入同盈利普遍可以按兩至三成幅度上升，估計中國燃氣未來可以至少保持相若步伐增長。上半年度用戶數目增長超過兩成，主要受到新接駁項目帶動，未來氣價市場化，可以帶動收入進一步上升，盈利增長可測性相當高。如果市場開始回復理性，呢類股份會比較受歡迎。
論圖表，中國燃氣依然係保持一浪高過一浪形態，難得3月份新經濟股係咁跌，中國燃氣股價只係出現健康調整，高位跌到低位唔夠一成，遠比騰訊硬淨，走勢亦好過同概念華潤燃氣(1193)、新奧燃氣(2688)，長線亦係燃氣股首選。現價買入，以30倍市盈率定價，中線睇16.4元，跌破上周低位11.56元止蝕。
晉佳
本欄逢周三刊登
上一則: 一周三件：大連港平靚正 - 錢雋
下一則: Follow Me：東嶽折讓大睇升21% - 高彰坡
智取大市 - 晉佳 舊文
