「季結恐懼症」完結
2014年04月02日
恒指昨日升了297點，收22448點，有人認為聯儲局主席耶倫話不一定明年初加息，谷高股市。我就話耶倫車前退後在調控市場對加息的預期，對大市的確有少少利好作用，但真正推高大市的，卻是季結的壓力完了。
前一排美股以至港股都出現一個現象，就係早前炒得好熱的股份，一回都回得好厲害，美國跌生物科技股、科技股，香港嘅科網股、濠賭股，一係唔跌，一跌就10%、20%咁插。
呢啲大升股急跌，同3月底季結期有關。基金佬有「季結恐懼症」，佢哋揸住啲急升股，手上本來利潤頗豐，但一見佢跌，又好近季結，就怕利潤急速蒸發，甚至衰起上來倒輸，最佳的應變方法是馬上止賺，過完季結再算。止賺人多、撈底人少，觸發更深的下挫。
開季搶入 濠賭科網
好啦，昨日開始季結恐懼過去，港股就顯著向上，基金佬如放監出來一樣，專掃那些之前跌得好甘的熱門股，其實基金佬係好喜歡這些股票，早前被季結壓住唔敢買。但如今佢哋亦好怕持有這些熱門股太少，若然新一季又係呢啲股領漲，手上無貨就好唔掂。
之前跌得好甘的科技股昨日亦全面抽升，網龍(777) 爆升9%，手遊股博雅互動(434) 亦錄得8%升幅。濠賭股就上午升一半，下午升一半，皆因澳門午後公佈3月博彩收入為354億澳門元，按年升13%，按月則跌6.7%。以今年首季計，澳門博彩收入為1022億澳門元，按年升19.8%，數字符合市場預期。數據公佈後，濠賭股升幅擴大。
若然上述「季結恐懼症完結」的推論正確，股市會好似失去壓力咁反彈一浪，直至基金佬買夠貨為止，通常年頭兩三日的市道，亦有類似的情況。
另一方面，招商局國際(144) 前日宣佈發行強制可換股證券，集資最多154億元，昨日就衰啦，逆市下跌3.9%，收市報25.6元。佢搞呢種「強制可換證券」，搞到複複雜雜，都可以拆吓局。
招商發證 阿媽增持
先睇睇市場反應，小股東當招商變相供股，唔多受喎，結果昨日佢逆市跌3.9%，收25.6元。我用一種婆仔式計數法去計，那些強制可換股證券未來三年分別獲8厘、6厘及4厘的固定派息，拉平均即係6厘，家招商局派緊3厘息，假設佢未來三年派息平衡無下跌，可換股證券一年收多3厘息，三年收多9厘，但換股價高18%，咁粗粗哋計貴咗9%，想買招商局，不如家買正股仲好啦。
你話招商局未來亦可能生意唔好正股減派息，可換股證券有固定派息喎？咁重大鑊，佢生意唔好，股價會跌，換股價同樣是固定的，就顯得更貴。招商局咁做表面為減債，實情有無唔想人供的盤算，你唔供大股東供埋，即係大股東增持，減少街貨，可能有後着，或許睇好公司前景，或許同公司重組有關。如果想博吓，可以等佢插啲買少少現貨坐吓，供可換股證就唔好搞啦。
陸羽仁
金融High Tea 舊文
