情陷夜中環：11次 - 葉朗程
■為博Danielle一笑，筆者破例買了一束火紅色的玫瑰。
老掉牙的求婚對白，配合以下的預設場景。男生買12朵玫瑰，有11朵是真花，其中一朵是假花。女生不滿問道：「點解要買朵假花？」男生掏出一枚鑽戒，在女生面前跪下來，再抬起頭，眼裏閃爍著深情，夾雜唔鹹唔淡的英文說：「嫁畀我，I will love you until the last flower dies。」
骨都痹埋，勁無聊囉，明知花會死，為甚麼女人都喜歡收花？因為女人就是喜歡見到你使錢，所以她們喜歡收的，是你從花舖買回來的花，而不是你自己種出來的花。我有個朋友，試過好有心機咁種咗一盆好靚嘅紫羅蘭，然後情人節嗰日，送咗去女朋友公司。女朋友立刻send個WhatsApp，怒氣沖沖問：「呢盆乜嘢嚟㗎？你係唔係玩嘢？」
發誓，一世人未買過花。真話不怕講兩次，個誓再發毒啲都得：發誓，一世未買過花，如果呃你，永冇發達。話雖如此，是日，終於破例。Well，愛情就是這樣的。當你愛一個人，總要破啲嘢。為著愛情，有啲人破產，有啲人破處，我純粹破嚇例，好濕碎。
那一天，難得全副武裝上陣，必須花點篇幅曬一曬行頭。Hugo Boss西裝、紅色Paul Smith領呔、Gucci皮帶和皮鞋，再加一張俊臉，就這樣走入遮打大廈的Armani Fiori，花舖內的兩位姐姐，差啲流口水，我覺得。
原來，花舖的花是沒有價錢牌的，實在不知如何選擇，而且這裏的花沒有太鮮艷的顏色，大概是Armani的風格吧。見我來回踱步良久，醒目的店員說：「呢幾款都好多人買，大概1,300至1,600蚊。」嘩，個心定曬，咁大紮都淨係1,600蚊，抵到爛。Thank you，你點稱呼？「我叫Janet。」你好Janet，我想買紮花一陣間去機場接機，你有冇啲熱情少少嘅款？Janet想一想，然後指著其中一紮說：「呢紮都幾熱情，女仔會鍾意。」
紅玫瑰原來分三種
看來Janet不太明白我的意思，惟有講白少少。我想要啲好誇好誇、女仔一見到就會好熱情嗰啲、誇到「嘩嘩聲」嗰啲。Janet微笑問道：「你係乜嘢budget？」我也給她回一個微笑，實話實說：「只要我兩隻手攞得曬就得，冇budget。」Janet先來一個「原來如此」的表情，再走到花舖的另一邊，從一個類似雪櫃的隱蔽地方，拿出很大束紅玫瑰。
曾經有個client考我，問我是否知道不同顏色的紅玫瑰有甚麼不同意義。我搖頭，紅玫瑰不就是紅玫瑰嗎？還可以有甚麼「不同顏色」的紅玫瑰？那個client的老婆非常喜歡收花，所以client很清楚紅玫瑰的種類，總之就是有純紅、鮮紅和火紅三種。雖然我完全搞不清三種顏色的各自含義，但我肯定Janet拿出這束屬於火紅，很美。
Yes，就係要呢啲。「但係冇咁快喎，我仲要剪同裝飾，你趕唔趕？」半個鐘得唔得？「盡量盡量。」我返公司然後再回來花舖，Janet已經成功把超過20朵紅玫瑰拼成一件充滿動感的藝術品，果然不負Armani之名。埋單盛惠幾多？唉，講呢啲。想知，問Janet，嗰位好靚仔又話冇budget嘅儍佬，放低咗幾錢。
去到機場，發覺拿著這麼大的一束花，是如此礙眼和尷尬。我在機場內的Starbucks附近，找一個靜靜的角落坐下，等待Danielle來電。沒多久，Danielle傳來短訊，說已經在行李輸送帶等候著。「邊個Arrival hall？」我問。答案是Hall B，即是我還要拿著這束花橫跨整個機場。
捧著鮮花，昂首闊步，慢慢走到Hall B，Danielle也剛出來。好久沒見，我望著她，腳有點軟。除我之外，有幾個男人也在喪𥄫，其中一位，身邊更有一個類似老婆的物體。「老婆物體」沒有注意到老公在看甚麼，因她自己也是眼定定看著。Danielle終於看到我，她的左手繼續推著行李車，右手則掩著嘴巴，眼睛瞪得大大，一邊笑一邊做出一個「oh my god」的口形。
「好靚呀，多謝！」Danielle接過鮮花，笑得忘形。「無端端送花，有乜嘢企圖？」預祝你聽日interview成功。「唔知點解，今次interview好緊張，飛機都瞓得唔好，以前見工都唔會咁。」我相信，這份工，Danielle是志在必得的。很多事都在電話談得八八九九，人哋出埋機票飛你過嚟香港，誠意盡見。當然，見的是甚麼工，唔畀講。
每年送一次有原因
我們向著停車場方向，邊談邊走。Well，今次你特別緊張，原因好明顯，你知唔知點解？「點解呀大作家？」因為我，你好想留喺香港。「原來仲有幾朵花未開得曬。」Danielle望著鮮花，裝作聽不見。終於到達停車場，我把行李搬到車尾箱，然後問她：「Your place or my place？」Danielle望一望我，忽然若有所思的樣子。「你答我一個問題，我先答你個問題。」她說。
雖然行得正企得正，但看到她這樣凝重，我有點怕。好呀，問啦，我強裝鎮定。「送過幾多次花畀女人？」嚇得我，原來問呢啲。等等，要數數。唔計送畀你呢次，11次。Danielle嘗試擠出一個大方的笑容，但演技好差。「I see，11次唔同人，定係一個人送11次？」
一個人送11次，我想也不用想。Danielle了解我，知道我幾時講笑，幾時講真，佢知我今次講真。看到她繼續強裝大方的表情，而且口唇有點震，我好high。「Alright，點解記得咁清楚係11次？」
我走近Danielle兩步，在她耳邊輕輕說：「我嫲嫲12年前過身，每次清明節，我會送花畀佢，所以嚟緊個星期六，我又會送。如果你介意，到時我同嫲嫲講聲。」
葉朗程
上一則: 好不主席：曾經維海難為水 - 盧先亞
下一則: 長實申請油塘建住宅
情陷夜中環 - 葉朗程 舊文
