中環在線：嘉德首設珠寶鐘錶專場新亞教授畫作現身春拍 - 李華華
■嘉德香港獲新亞藝術系早期學生協助，收集到丁衍庸和陳士文兩位教授嘅作品。黃耀興攝
內地兩大拍賣行保利文化(3636)與嘉德近日不約而同在港舉行春拍，嘉德香港噚日開始舉行預展，今日至周三正式拍賣。嘉德舊年春拍時首設「香港水墨」專場，展示廿位香港藝術家嘅作品，今年就策劃「新亞藝聲」，介紹丁衍庸與陳士文教授嘅作品，顯示出嘉德在港發展嘅誠意。
■丁衍庸(左)和陳士文(右)。
共過千件拍品
相對保利春拍有2,000件拍品，總估值逾7億元，嘉德今次嘅拍賣規模唔算大，五個專場共過千件拍品，總裁胡妍妍估計，整批拍品總估值約3至4億元。
胡妍妍強調，香港市場暫時仍處於試水溫階段，嘉德打算穩步發展，唔期望每年嘅拍賣成交倍增，反而希望每次拍賣可以新增項目，今年春拍就增加珠寶與鐘錶專場。
■總裁胡妍妍
嘉德亦特別為本港市場設立香港環節，胡妍妍承認，因為希望增加親切感，所以設香港環節，過程其實唔簡單，首先要確定邊位藝術家，接住要搵到一定數量嘅作品，搵到願意割愛嘅藏家。今次得到新亞藝術系早期學生協助，收集到丁衍庸與陳士文教授嘅作品，才有呢個新亞藝聲環節。
丁衍庸與陳士文教授係新亞書院藝術系，亦即後來中文大學藝術系創系以來嘅主力教授。據當時學生憶述，丁教授嘅國畫課最精彩，佢畀學生旁觀佢畫畫，以示範代講授。陳教授就喺法國受過正統學院訓練，更多負責素描與速寫等基礎訓練。
對於對手保利早排在港上市集資，增加資本實力擴展業務，胡妍妍不以為然，回應話嘉德冇上市計劃。
重點拍品
■【交臂】吳冠中估價：1,200萬至1,800萬元
江詩丹頓250周年紀念版
Les Metiers d"Art 18K紅金琺瑯手錶
嘉德香港春拍新增珠寶鐘錶專場，鐘錶重點拍品係呢隻江詩丹頓250周年紀念版。據講，紀念版一套四隻，分別用白金、黃金 、紅金、鉑金製造，全球限量12套，今次係首次有人拎出其中一隻紅金製手錶拍賣，估價約100萬至120萬元。
李華華
mailto:LiWaWa@AppleDaily.com
上一則: 南車電動巴洽進軍香港
下一則: 中環在線：福臨門過大海快成事 - 李華華
中環在線 - 李華華 舊文
