青心直說：三個25萬故事 - 胡孟青
■筆者道出近日發生三則與市場有關的故事，無巧不成話，均與25萬元有關。路透社
清明節假期最為人注意的一宗新聞，就是法拉利醉駕事件，有人會把焦點放在主席很有米，兩公婆一個揸法拉利、一個揸林寶，但令人最側目的，反而是其有錢之同時都係無品，借醉撒野，以為識踩油門就叫揸車，實在恐怖，有辱超級名車品牌。
世界好公平，遇上鐵面無私的警長，擺明唔怕你，醉駕形同謀殺，同行所謂著名女司儀更加欠普通常識，阻記者拍攝形同防礙新聞自由，酒醉三分醒，當街發酒癲，還講私隱？不顧身世，明顯是自己失禮在先。
早前有人曾因為捐出25萬元買入名媛包包，並從689的手中領過包包而為人所識，難免沾沾自喜。這類勉強80後富二代，即使被網上審判，亦只懂掩耳盜鈴。
一隻手掌怎拍得響？
在另一邊廂的公仔箱，有香港演員被指過份向錢看，濫接爛劇，視帝鄭嘉穎身價每集25萬元，難得的是，寫爛劇本的不被指摘。
上經濟學第一課：demand & supply，你內地開劇的老闆畀得起而又肯畀，人家自然睇錢份上才北上混口飯吃，來者不拒，又有何不妥？
受人錢財，出了問題的其實並非演技而是劇本；港星搵快錢心態作遂，唔理好醜，自然抵打，但更想知的，是一隻手掌如何拍得響？
而無獨有偶，話說行內最近流傳另類交易，因為做得太揚，不少專搞企業上市融資的行內人與上市公司老闆，近期都議論紛紛，因為有持牌人士竟向上市公司主動兜售，名碼實價，索10萬元寫5篇鱔稿。
至於推介爛新股，叫價竟巧合地，又係25萬元，現金交收不留痕，quote咗價而不去馬，更危險，隨時有機會被集體唱衰，還要唔包生仔，難產生唔出照收錢冇回水，即係唔擔保你掛牌後唔潛水，關鍵係招股時已鋪天蓋地落足嘴頭𠱁阿婆真金白銀去馬認購，志在透過公開認購散一轉貨，再向下炒待善信哀莫大於心死，再低價回收爛股，之後翻炒又好、賣殼又好，博多一轉。
爛股當道，原來又不能完全怪罪港交所(388)。
胡孟青
獨立股評人
上一則: 異動空間：彈散市忌手痕 - 魏力
下一則: 一名經人：歐日淡商幣好 - 羅家聰
青心直說 - 胡孟青 舊文
