齊來賭中國
2014年04月07日
美國本來話睇吓上周五新增職位得唔得，講到好似數字得美股就會大升咁款，點知數字的確係得，新增職位有19.2萬個，美股一度創新高，杜指曾升見16631點的日中新高，但其後轉勢倒跌，最後插159點收市。美股係被早前急升的科網股和生化股持續捱沽拖累，納指更急跌110點收市。
你問點解跌？其實理由好簡單，升得多咪跌囉，升得多就想調整，職位數字呢啲大家都預咗會出現的好消息，到兌現時好容易成為大市下跌的藉口，因為好消息出現時，一定有班後知後覺的散戶入市，形成好大的接貨力，所以大戶會借好消息出貨，順手沽落嚟。
舉例一隻股派高息，在除淨日前大幅炒高，好多散戶都搶在除淨前入貨，想連息都收埋，點知除淨後就大跌，唔止除淨會扣咗派息個銀碼，隨時跌多10%以上，皆因大戶知道散戶貪息，就炒到突晒兼派貨，散戶盲摸摸就高高都去接。
騰訊到百天綫調整未完
講番美股，呢排跌都係由生化股和科網股帶動，呢啲股下跌都只係因為之前大升咗，升得太癲，所以要深度調整，未調整夠，反彈完都要再跌。香港好少生化股，只有科網股，好似騰訊(700) ，佢咁大隻，都係跟住美國個大潮流走，美國科網股回，佢好難唔回。
有朋友揸咗騰訊，見佢回吐，成日都「急問點算」。騰訊高位646元，家回到525元，已經回咗18.7%，好似好多，但大家唔好忘記，佢一年低位先至係237元，佢回咗咁多後，距低位仲升咗122%，仲係升咗唔少。睇圖騰訊只係回到100天線左近，距離250天線即係408元，仲係好遠，即係話再回深啲都唔算好離譜。講基本因素，騰訊去年盈利增長22%差過預期，市盈率48.5倍，市值高達9786億，市旺時升多多都得，市一靜落深啲亦可以。
結論係騰訊散唔散，首先睇美國科網股炒作潮完未，若然未完，家只是調整，由於之前升得太急，現時還有較多水位向下調整。騰訊呢啲48.5倍市盈率咁貴的股票，好難買來投資，要買只是投機，但投機只宜順勢，想炒都等佢企番定啲先玩好啲，可能貴啲，但安全少少，以免一買又要止蝕。
華僑買永亨博大中華
周末和中環茶友飲茶，講到睇好或睇淡中國的問題，講起有外資睇中國睇得好淡，好似大摩估中國最差只有5%增長。我就話固然有人睇好，有人睇淡，但亦有人真金白銀落注，買中國的未來。好似新加坡第二大銀行華僑銀行，上周斥資387億元全購永亨銀行(302) ，就真係一注獨贏賭中國前景，落重注去博人民幣業務。大家都認為華僑銀行落咁重注去賭，點睇都係一個好友。
以外觀計，華僑銀行買永亨相當貴，新加坡《海峽時報》評價都有少少負面，以「華僑逾60億元坡幣對賭中國令人存疑」為題，發表文章，指華僑銀行股價的市帳率(市價對資產淨值比率)約1.3倍，但是卻付出近2倍市帳率作價去收購永亨銀行，在已經過度擠逼的本港市場擴張，「不太合理」﹔換言之，評論認為，華僑銀行作價太高。
《海峽時報》的報道認為，目前內地經濟正放緩，加上美國退市，在雙重風險下，隨時令本港存款資金逆轉外流，低成本資金不再出現。
收購永亨銀行可令華僑銀行的中港澳分行數目即時大增，推高大中華市場對華僑銀行盈利貢獻比重，但《海峽時報》話，另一對手星展銀行，早已經穩佔大中華業務的優勢。
東亞大新唔易賣盤
該報又引述華僑銀行年報顯示，華僑銀行政總裁錢乃驥去年薪酬(固定薪金加花紅)按年大升60.4%至882萬坡幣(約5400萬港元)，當中佔薪酬一半以上的花紅大增1.5倍至450萬坡幣，但期內華僑銀行核心盈利則微跌2%至27.7億坡幣。報道指錢乃驥是推動華僑銀行力拓大中華市場的推手，不過與當地其他銀行大班相比，錢乃驥薪酬仍然稍為落後，因為新加坡最大銀行星展銀行集團行政總裁高博德，以及另一銀行大華銀行行政總裁黃一宗，去年度薪酬總額均達920萬坡幣。
《海峽時報》雖然批評華僑銀行的出價貴，但華僑的主要對手星展早已買咗道亨開拓大中華市場，華僑銀行出手買永亨，只為追趕對手。若然華僑買永亨係對賭中國的話，佢無乜選擇，只能焗賭，否則中國經濟規模愈來愈大，佢同星展的差距就會拉得愈來愈遠。華僑銀行出咁多人工請錢乃驥呢個長期在香港打滾的人做CEO，都係想佢拓展大中華業務啫。
內地和新加坡的銀行都搶着在香港買本地銀行插旗，為的是本地逐漸擴大的人民幣業務，而內地銀行控制香港銀行是一個打開海外業務的出口。從買股角度睇，創銀(1111) 和永亨先後出手後，只餘東亞(023) 和大新(2356) 尚為華資家族持有。
內地行插旗港證券股
大新現價12.66元，市盈率9.04倍，市帳率1.03倍，市值177.4億。東亞現價31.6元，市盈率11.4倍，市帳率1.14倍，市值735億。兩者比較，大新細隻啲，股價又低啲。不過聽市場消息，大新家族賣盤意欲不高，若非出價極吸引，根本不會考慮。東亞股權較分散，國浩又揸住咁多，所以出現併購的機會反而大少少，但佢太大隻，亦唔易成事。所以買呢啲股只可以低吸，唔好高追，買入要有長期作戰的準備。
博銀行賣盤，唔夠博證券行賣盤咁快。上周傳出港交所(388) 同上海交易所傾緊雙向互聯，即係雙向直通車，內地可以買港股，香港可以買A股。港交所其後出咗個通告，作技術否認。我估呢件事早晚會發生，但安排相當複雜，未必太快可以傾掂，而且開始時多數有數量限制，唔會無限量放開，以免對市場構成太大衝擊，所以唔好估新政一嚟就好似2007年咁大升，但長線就利好。
你睇好多內地證券行一係就嚟香港上市，一係就買香港的細證券行，都係用各種方法喺香港插旗，佢哋呢招係一舉幾得，首先內地證券行老闆都想調錢出來，留番條後路，其次係佢哋都知道大方向係兩地股市互聯互通，在香港有基地，將來內地客買港股生意可以食埋。第三，即使未互通都有唔少錢偷偷嚟香港炒作，例如炒金，內地客好似都炒得好狼，內地證券行早啲在香港搞作，一啲都無壞。
睇埋呢啲大發展，結論係中長線都可以維持做中國好友，去賭中國五年、十年後好掂，賭人民幣逐步去向自由兌換，賭香港無嘢得但做人民幣業務都有得食，唔好加入外資做中國淡友，講到中國好似就快爆炸，有乜中國資產都要沽清咁款。
當然長遠樂觀，唔等如短期要飛身撲入去大買特買，短線個市反彈到咁上下，好似想回，可以等耐少少，等佢低啲再買，都未為晚也，有貨可以坐吓，亦唔好急急腳清倉喎！
陸羽仁
金融High Tea 舊文
