魚樂無窮：海通國際博見五字頭 - 唐牛
■博證券行業有大政策出台，順藤摸瓜可考慮券商股海通國際；圖為海通國際董事總經理林湧。 資料圖片
上周五推介嘅中國光纖(3777)，開市前有82球上板，相當於已發行股本5.7%，都算幾大lot貨。究竟係乜單位高手過招，執筆之時仍未有消息，但從好嘅角度睇，公司剛剛泊到大碼頭，話唔定有強人入股，加上收市企穩上板價2.03元之上，證明有買盤支持，可繼續觀察。
去年盈利勁升八成
近日最強勢嘅股份，非弱咗半個年頭嘅港交所(388)莫屬，市傳公司與上交所嘅網絡互通政策已上報中央審批，雖然港交所例牌否認，但股價明顯背道而馳，連續三日大成交炒高11蚊，唔似博大霧，始終中港交易所融合乃大趨勢，聰明錢率先進駐，實在唔出奇！
博證券行業有大政策出台，順藤摸瓜可考慮券商股海通國際(665)。公司有內地龍頭券商海通證券(6837)做大股東，後台贏曬。實際業績也不失禮，去年盈利勁升八成至5.3億銀，主要受惠轉型構建「大投行」架構，為企業客戶提供全方位投資及融資解決方案，並參與多個知名IPO項目，包括銀河證券(6881)、中石化煉化(2386)等，令結構性投融資收益勁升1.4倍至2.1億銀，成為增長引擎。
睇估值，海通國際現價市盈率10.7倍，比同業國泰君安(1788)嘅13.7倍平一大截，更有4.3厘息打底，值博率一流。
睇圖表，上周五大成交突破雙頂阻力4.35元，動力十足，一旦有政策跟尾，好快見五字頭。
唐牛
上一則: Follow Me：中交建大落後最抵買 - 高彰坡
下一則: 股場放大鏡：凱升俄開賭概念可取 - 歐陽風
魚樂無窮 - 唐牛 舊文
