等谷爆
2014年04月04日
美股再挑戰新高，帶動港股高開，加上內地推出三招刺激經濟政策，國企表現不俗，但高開後，逼近兩萬三開始有阻力，之後內地股市呆呆滯滯，大市升幅變咗唔係咁多。藍籌股比較搶眼係港交所(388) ，一度壓倒早排的擂台躉騰訊(700) ，成為交投最多股份。
股市位高未跌住
港交所搞到咁熱鬧，主要有報道話佢同上海交易所搞緊聯網，呢個講法令人聯想起港股直通車，股價即時爆上，港交所係升咗5%後停牌，澄清互聯互通未有結果。雖然係咁，港交所股價復牌仍然幾硬淨，收市再升0.8元，報126.8元。
港股變相直通車未食得胡住，但國務院總理李克強昨日主持國務院常務會議，部署加快棚戶區改造，同時確定深化鐵路投融資體制改革等五項政策措施，相關板塊好似鐵路基建股掃高。恒指全日升41點，收報22565；國企表現好啲，指數收報10093，升70點，成交717億元。
港股高開後有小小窒步，除咗話內地繼續正回購收水外，都同美股逼近新高，大家有小小擔心佢會回吐有關。
對於內地媒體無端端爆出話港滬股市聯網，中環茶友估計無鬼唔會死人，無理由忽然爆出咁嘅消息，佢嘅分析係呢樣嘢確係傾緊，但唔知幾時先成事。近日事態發展，開始令佢對港交所前景改觀。
茶友話，自從李小加上咗台做行政總裁，佢對港交所股價唔係咁睇好，咁唔係佢對李小加有偏見，而係佢做嘢偏向內地嗰套，傾向超前建設。內地有十三億人，樣樣嘢需求都好大，內地政府過去做嘢，都係用計劃先行，好似起樓唔使理有無人住，總之起咗成千上萬單位，跟住好快就湧現需求，鐵路、電網、機場全部係咁，上海話要發展浦東，唔理佢係唔係爛地一塊，無交通配套，總之一、二、三就郁手。
李小加搞港交所有少少都係咁，總之佢就覺得內地咁多水，而且不斷累積，遲早谷爆，所以要一早整定個大水塘去接水，佢一上任就動作多多，大搞班底，結果內地水未到，港交所使費已經大增，再加埋收購倫敦金屬交易所負擔唔少，你話港交所條數點會靚先？睇番過去五年，港交所賺錢上上落落，股東應佔利潤係2012年的40.84億元，上年係45.52億元，以幾十倍市盈率嘅股份嚟講，如果佢唔係有獨家經營權，股價早就一仆一碌。所以佢做總裁之後，港交所股價唔見得標青。
港交所開始有概念
不過，內地?家話要深化改革，國企要進一步市場化，喺咁環境下，港滬吹出聯網固然令人憧憬，就算唔係，好似中信借中信泰富(267) 整體上市，都係一個炒作概念，如果國企有大龍鳳出台，李小加成日話挖水塘等內地資金池谷爆，唔知係咪真係俾佢等到，總之講起嚟就似層層好多囉。
港交所今年低位見過112.2元，?家已經彈番唔少，現價市盈率有32倍，息率2.8厘。茶友話，雖然佢對港交所改觀咗小小，但唔係叫你飛身瞓落去，因為呢類概念無咁快熱起上嚟嘅，最好係做好長線小小準備，慢慢吼平入貨，或者等到五窮六絕，個市傳統淡季先嚟吸納。
陸羽仁
金融High Tea 舊文
