魚樂無窮：香港電訊五厘息打底 - 唐牛
■息口暫未虞大變，高息股香港電訊繼續勇猛，近日拾級而上。資料圖片
建制派議員喺689答問大會，又淘寶又check股價，果然分秒必爭。恒指縱一度重越23000點大關，但其實未完全擺脫悶局，同年初歌舞昇平完全冇得比，但尊貴議員依然𥄫到實，究竟係689無能、答問大會悶爆，抑或個市有尋寶機會，相信只有佢最清楚。
返工期間經過銀行，見到多咗唔少散戶㩒報價機，入去八下普羅大眾炒開乜股，熒光幕出現得最多嘅冧巴，竟然係阿里概念孖寶——文化中國(1060)及中信21(241)。至於賬面係賺係蝕，可以從佢哋嘅對話同語氣搵到答案。散戶A︰「唉，隻1060好耐冇見過個八喇！」散戶B︰「隻241都係死死嚇咁。」一到12點收市就齊聲話︰「收市喇，返屋企煮飯啦。」
上述例子好大機會係冰山一角，反映今次大市由低位反彈千點，贏錢嘅人絕對唔係多數。市旺時博一棍可以有50格升幅，但而家唔少人蟹貨纏身，彈藥已經用得七七八八，冇乜人追異動股嘅情況下，一棍縮剩十零廿格，到你衝入去時，已經由藍海變火海。
加息無期高息股看俏
儲局雖然已啟動退市一段時間，但對於何時加息，態度依然保守。最新4月份會議紀錄更顯示，雖然貨幣正常化議題正在熱烈討論中，但唔代表即將加息，現時亦未有加息時間表，與會者更指寬鬆政策唔會加劇通脹，鴿味濃鬱。息口暫未虞大變，高息股繼續勇猛，香港電訊(6823)近日拾級而上，蟹貨唔多，兼且仲有五厘息打底，有望喺淡市中越走越強。
唐牛
上一則: 炒友Blog：嘉里物流橫行區築底 - 邱古奇
下一則: 股場放大鏡：珠管前景亮麗快起飛 - 歐陽風
魚樂無窮 - 唐牛 舊文
