中環在線：紅酒拍賣費Sir冇影香港曼迷緣慳一面 - 李華華
■1999年對費Sir係最有紀念價值嘅年份，當年曼聯喺歐冠盃決賽中補時，反勝拜仁奪冠，仲成為咗「三冠王」，所以呢批紅酒特別顯得有意義。
紅魔鬼曼聯自從由莫耶斯接手後，成績差到冇眼睇，莫耶斯最近仲被炒埋，慘在莫耶斯係由前主帥費格遜親自欽點。雖然如此，費格遜嘅地位依然崇高，佢委託佳士得拍賣嘅紅酒，明天有257件拍品在港拍賣，曼聯粉絲與傳統紅酒愛好者都有興趣，可惜費Sir唔會為拍賣在港現身，粉絲無緣見佢一面。
香港佳士得名酒部資深專家鄧卓謙透露，佳士得今晚會邀請20位VIP舉行一場晚宴，率先介紹費Sir呢批靚酒，出名鍾意飲紅酒、舊年曾委託佳士得拍賣一批珍藏嘅唐英年就唔會出席。
費Sir喺1991年開始收藏紅酒，認為培養足球以外嘅嗜好，有助佢分散注意力同減壓，佢甚至喺英國設有地下酒窖，越儲越多，2、3年前計一計數發現真係儲落好多，多到飲唔曬，於是決定拎出5,000支公開拍賣，總估值3,900萬港元(300萬英鎊)。
5,000支紅酒分開482件拍品拍賣，其中一半即257件明天在港拍賣，6月初有140件喺倫敦拍賣，其餘網拍，網拍買家可獲得費Sir簽名圖錄。
鄧卓謙推介兩件費Sir嘅紅酒拍品，其中一件係6支1999年嘅紅酒，事關1999年對費Sir係最有紀念價值嘅年份，當年曼聯喺歐冠決賽中補時，漂亮反勝拜仁奪冠，勇奪「三冠王」(英超、足總杯和歐冠)。另一件拍品係一支有費Sir簽名嘅紅酒，估值1萬左右。所以鄧卓謙話，唔係所有拍品都係好貴。
李華華
mailto:LiWaWa@AppleDaily.com
【6支Romanée-Conti Grand Cru 1999 連一件簽名波衫】估值：65萬至85萬元
【有費Sir簽名Imperiale Sassicaia 2005】估值：1萬至1.2萬元
上一則: 旭光大股東公司不見人影
下一則: 中環在線：林寶珍藏館開幕閃光燈不停 - 李華華
中環在線 - 李華華 舊文
