異動空間：點樣盡用反彈浪 - 魏力
二萬三到站，熊仔重貨區已滅，接下來應是二三線股show time。各板塊百花齊放，但手頭資金得幾注，點揀先最有效率？有時真係幾頭痛。每日坐喺報價機前面，當然可跳來跳去，見升就撲，唔鬱就換馬，但咁樣相當費神，腎上腺素飆升，打機式炒股，贏在刺激，輸在傭金，除非係一流高手，否則等於自殘，實不可取。
想效率高啲，唔使成日睇實，又賺到唔錯的回報，可以試用以下方法(當然唔係寫包單賺梗)：揀五個板塊，各挑一隻績優股，買完擺埋一邊，跌10%止蝕，一路坐上去。5月13日，魏力推介信義光能(968)，當時賣1.9元，昨收2.16元，賬面執14%，可以繼續揸。之後嗰日推介Dynam(6889)，至今都升9%，坐定定。5月15日薦吸通達(698)，整固幾日後應會再衝，毋須心急。去到本周一(19日)叫買中滔環保(1363)，昨行第一棍，應該冇揀錯。
仲有一發子彈，射去邊？藥股係穩中求勝之選。比較彭博綜合券商預測，最值博係四環醫藥(460)，今年盈利料增長23%，預測PE約24倍，4.3倍PB，睇落幾高，但好嘢有幾何平賣？目標11.2元，止蝕位8.4元。
魏力
http://www.facebook.com/2012jason
上一則: 何車500：江銅上望14.44元 - 何車
下一則: 青心直說：中俄憧憬無限 - 胡孟青
異動空間 - 魏力 舊文
