魚樂無窮：三個見頂徵兆逐格睇 - 唐牛
■大快活在今次跌浪中表現穩定，算係發揮到半隻公用股作用，市盈率及息率吸引。資料圖片
新經濟股繼續腥風血雨式洗倉，科網、濠賭、環保、新能源全部割價傾銷，龍頭股騰訊(700)、金山軟件(3888)、金沙(1928)、銀娛(027)由高位計起，起碼唔見兩至三成。恒指由去年高位計，只係跌咗一成，相對硬淨，卻又預示下跌空間其實好大。
大快活穩健吸引
港股由燦爛歸於平淡再走向悲慘，唐牛回想其實有跡可尋，當中三件事更係記憶猶新，不妨馬後炮式回顧。
第一，文化中國(1060)3月中宣佈獲阿里巴巴入股，復牌當日行經銀行，竟然有師奶們不停討論，姑勿論佢哋有冇入市，但科網股去到一個好廣泛嘅層面卻毋庸置疑，大戶將火棒交畀佢哋正常不過。文化中國復牌第一日亦已見頂。第二，有玩開藍籌及公用股嘅保守戰友，失驚無神轉移陣地染指科網濠賭股，連市場上最後一批資金都換馬，水尾味道的確濃鬱，結果係點？大家有眼睇。第三，倉位波幅明顯加大，簡言之，即係股價經常大上大落，基本因素完全派不上用場，股價由資金流向主導，成交亦係幾何級數式上升。傳統智慧話畀我哋聽，見頂總要有大成交配合，派貨活動先可以完美進行。下次大家見到啲類似情況，不妨自我驚惕一番。
快餐股在今次跌浪中表現穩定，算係發揮到半隻公用股嘅作用，其中大快活(052)近日出現圓底走勢，現價計無論市盈率及息率，均較一哥大家樂(341)吸引，一旦突破圓底頸線，可向16.7元進發。
唐牛
上一則: 炒友Blog：國藥績優宜分段吸納 - 邱古奇
下一則: 股場放大鏡：博阿里注資中信21 - 歐陽風
魚樂無窮 - 唐牛 舊文
