異動空間：濠賭股火燒眼眉 - 魏力
阿里遞交赴美上市文件，本來以為科網股有力一彈，點知Twitter禁售期屆滿，大戶極速瘋狂掟貨，反映情緒悲觀，完全係要錢唔要貨，搞到本來有點起色的軟件、手遊股全線再度仆直；騰訊(700)月中拆細前，基金唔畀面照洗倉，廿蚊廿蚊咁跌落去，這可能為拆細後提供炒作空間。4月初騰訊於500蚊回購過一次，之後都冇再出手，睇嚟對股價前景都唔多睇好。阿里股中信21世紀(241)屬逆市奇葩，三日反彈四成，突破下降軌，究竟係純炒阿里上市，定係幕後有大搞作？拭目以待。睇圖是可以跟進，但純粹跟勢，風險頗高，只宜小注行事。
冇股炒又手痕，與其賭牛熊證、窩輪畀發行商打劫，不如向相對公平的期權埋手。目前跌市方向明顯，趁月中前時間值損耗較少，可考慮造淡，投機性買入認沽期權，攻擊目標首選濠賭股銀河娛樂(027)。強國自由行旺丁不旺財，加埋打貪風及樓市持續下滑，財富效應消失，企業賴賬急增，火燒眼眉，仲點入賭場玩？銀娛近月形成下降通道，浪比浪低，MACD雙熊擴大，跌市成交高企，散貨味濃，短線勢考驗250日線57蚊，中線目標50蚊。
魏力
http://www.facebook.com/2012jason
上一則: 何車500：一拖4元博反彈 - 何車
下一則: 青心直說：救內房靠QE - 胡孟青
異動空間 - 魏力 舊文
