異動空間：狂派股息有啟示
新股恒發洋參(911)一開唔見25%，乙組分貨率達6.31%，孖展落大飛真係輸死人！市況模糊不清，全世界爭食雞糊，揸到一手貨唔夠錢填數，暗盤變成人踩人，加上每格深度唔夠，自然釀成悲劇。新股只係炒供求，市旺瞌埋眼都賺錢，但家陣莊家都先沽為敬，保薦人零護盤，個市有幾好心照不宣。都係要賭的話，最好去提供暗盤的證券行落飛，唔對路亦可九秒九閃人，盡量減低損失。
近排魏力好少推股，並非冇股炒只係日日新款，轉得快過快餐店餐牌，今日大折讓H股、明日環保股、後日殼股，每款一日貨仔，除非閣下有預知能力，9點半即刻落注，否則一追九成係高位，入貨呆坐幾日，資金綁死都算，仲要每日輸啲，捱唔住一沽就彈。與過去兩年相反，呢排異動股一破位就回，變成推乜都跌，為免成新一代明燈，冧把還是免了。戰友有好股不妨去fb分享，集思廣益。
互太紡織(1382)剛出全年業績，純利增長21%，連特別息派1.05元，股息率11厘，表面超吸引，但除息後股價會調整，買來收息無著數，何況公司盡派盈利，或代表發展空間有限，這才是股價最大的負面因素。
魏力
http://www.facebook.com/2012jason
魏力
異動空間 - 魏力 舊文
