水乾新股插
2014年06月30日
時近半年結，港股夾上高位，恒指上返23000點樓上，半年結都似在高位計數，唔係插返落去，芬佬可以放下心頭大石。
上周出席一個投資講座，聽聽美資行點睇下半年大市。基本上他們比較睇好美國歐洲股市，唔多睇好港股及內地股市。主要係話在香港見過好多客，都話對內地市前景無乜信心，港股受內地影響，好多香港有錢人，都寧願揸住現金，都唔願買港股，所以覺得中港兩地股市暫時無景。
美資大行推薦歐股，話唔明點解本地投資者若然唔買港股，點解唔去考慮吓投資歐股，原因係歐洲央行正在複製美國的貨幣政策。美國此前大放水，將經濟同股市推番上去，家開始收水，慢慢將擴張的循環逆轉。歐洲央行正準備QE放水，覺得歐股會步美國後塵，同樣炒上。香港人少留意歐股，美資行呢個睇法值得深思，唔想太麻煩直接買歐股，都可以買歐股ETF(上市基金)。
炒洋參股 如受恐襲
講完大趨勢，睇番本地新股市場。呢期新股頗為災難，好多插到阿媽都唔認得，甚至係一些認購狀況較好的新股，一樣大插特插！例如恒發洋參(911) ，公開招股有50倍認購，唔知係唔係揀錯冧巴911，上市十足十恐怖襲擊咁，暗盤已經唔掂，大瀉15%。上周五首日掛牌，開市1.48元，較招股價1.98元深潛超過25%，之後反彈上1.67元，已經係全日最高，之後逐級回落，收市報1.5元，插逾24%，散戶認購燒傷手指。
呢一輪新股上市雖多，但質量一般，早前有網友問我有乜新股好認購，我都答唔到，話無乜特別吸引。後來問吓芬佬，佢哋話暢捷通(1588) 同隻恒發洋參都幾受歡迎多人認吓，結果公開發售超購50倍的恒發洋參勁插24%，公開發售超購209倍的暢捷通在上周四掛牌，亦連插兩日，得番14.4元，比招股價16.38元低12%。
隻恒發洋參受人注意，主要因為佢生意實在而已。佢係本地最大一級西洋參批發商，做乜生意容易明白，有食花旗參的股民就有感覺，以1.98元招股價計，等如今年預測市盈率15倍，呢個價其實唔係咁平，跌咗咁多得番11.4倍，開始唔貴，但亦唔代表無得再跌。以日日話佢哋會死的內銀股為例，好似建行(939) 咁升咗唔少，歷史市盈率亦只係5.3倍，息率6.6厘；一比之下，洋參股11.4倍的市盈率，唔係咁有防守力，而且呢類股無乜憧憬，亦不一定有人炒，所以散戶緊守止蝕好啲。
強手離場 弱手充斥
新股係咁跌，連熱股都跌埋，有芬佬解釋話，時近半年結，市場比較乾水，新股都主要係散戶去搶，借孖展去認購，基金採觀望態度。結果一隻新股打響「潛水」第一槍，其他全線都唔掂，因為新股市場有太多孖展貨，冇得守，一插就被迫斬倉。一隻係咁，隻隻都係咁。
我就覺得新股咁跌法相當詭異，說到底係強手唔玩、弱手充斥市場的結果。既令人覺得「打新股」唔易，相信除非新股狀況改善，否則大市潛藏虛弱因素。
呢一輪上市的新股中，其實暢捷通有啲來頭。呢隻股做內地微小企業軟件系統的公司，由內地知名軟件企業用友軟件分拆出來，係第一隻A股拆H股子公司的個案，用友軟件有借呢間子公司打開H股通道的味道，所以才吸引到209倍認購，結果一樣唔掂。暢捷通上市價16.38元，市盈率21.3倍左右，市盈率係唔平，但同行金蝶國際(268) 市盈率38倍，暢捷通本來有一定吸引力，估唔到一樣跟大圍插。
呢度要講吓暢捷通個阿媽用友同金蝶的對比，十幾年前內地講財務軟件的年代，有「南金蝶，北用友」的說法，其實當時用友已領先，如今兩者更有巨大差異。金蝶在2001年2月搶先在香港創業板上市，發行新股作價市盈率22倍，集資淨額7200萬元。同年5月，用友在上海上市，發行新股市盈率高達64倍，集資淨額9億元(人民幣，下同)，而且上市第一天，用友由發行價36.68元衝高到100元，而金蝶面對香港低迷市況，由發行價1.03港元，插到得番幾毫。上市前兩間公司條件本已不同，上市後差距進一步拉大。
用友金蝶 多年死敵
13年之後的今天，金蝶和用友已差得很遠。金蝶今年3月17日公佈了2013年全年業績，雖然營業額16.2億元，下降了9%，但業務調整得宜，控制成本有效，扭虧為盈，有純利1.3億元(對上一年虧損1.4億元)。由於金蝶獲利超過市場預期，金蝶總裁徐少春都有番少少笑容，公佈業績後當天，金蝶股價大幅上漲13%，收報3.23港元(現價回到2.55港元)。
用友總裁王文京睇到金蝶股價在香港升到咁高，相信會嗤之以鼻。同樣在3月17日公佈業績的用友，去年營業額43.6億元，比上年同期增長3%；純利5.5億元，比上一年增長44.3%。
即係話用友生意規模係金蝶2.7倍，純利係金蝶4.2倍，兩者有明顯差距。以現價計，A股上市的用友總市值159.1億元，市盈率28.9倍。金蝶市值63.3億港元，市盈率39.8倍。以市盈率計金蝶貴過用友好多。
2012和2013年因為內地經濟緊縮，投放在軟件的金額減少，被視為軟件業的寒冬。如今冬天過後，金蝶擁抱阿里巴巴，用友和電訊營運商合作，各自走不同的路。但金蝶的行為更有炒味，佢在去年12月宣佈，將與阿里巴巴一同推出針對內地電子商務企業的專業級財務管理軟件，以協助相關企業精細化管控。兩者合作的消息公佈後，金蝶的股價創下年內最大單日升幅，由2港元左右大幅炒上，最高見過3.69港元，然後回吐，金蝶股價存在不少炒作手影，所以即使回落後仍比用友貴咁多。
暢捷通插 候低留意
不過用友分拆暢捷通來港上市，亦有狙擊金蝶的味道。暢捷通係用友最賺錢的子公司。暢捷通過去3年業績平穩，2011年營業額3.06億元，2012年營業額3.3億元，2013年營業額為3.12億元，呢3年純利分別為1.27億元、1.19億元、1.2億元(只有1%增長)。表面睇數字唔太吸引，但過去兩年是內地軟件業低潮之年。國泰君安估計，暢捷通2014、2015的盈利為1.27億及1.47億元人民幣，增速漸加快。
暢捷通盈利水平和金蝶相若，佢一上市就跌，現價市盈率約18.7倍，再跌一跌會拉走金蝶的捧場客，除非金蝶同阿里巴巴搞出大茶飯，否則難阻市場將佢同暢捷通比較。
若對內地軟件股有興趣，可以望暢捷通再跌深啲，若再插兩成到市盈率15倍樓下，可以留意。但呢啲新股上市遇跌浪，不用太急去買，因為好多蟹貨，要慢慢整固收集，所以想買要有耐性，等佢跌到定橫行唔再穿底時，再去買都未遲。
陸羽仁
金融High Tea 舊文
