入水抽水
2014年08月06日
匯豐中國7月服務業採購經理人指數(PMI)跌至50，創紀錄新低，周一急升的內地股市回軟，但葡萄牙聖靈銀行(BES)危機化解，歐債危機退卻，加上隔夜美股反彈，好壞消息參半下，港股昨日走勢亦見反覆。恒指全日收報24648點，升48點；大市成交金額708.5億元。
騰訊(700) 與匯控(005) 是港股尾市倒升功臣，兩股共向恒指進貢138點。騰訊更創上市新高，股價高見134元，全日升3.33%，收報133.5元，跑贏一眾藍籌股。
大巿經過七翻身升咗兩千點後，開始牛皮消化階段，美股喺高位調整，暫時壓住個市，加上本來係炒緊資金流入，不過8月份起，人行再度正回購，中港變成一邊入水，一邊抽水，唔再係單邊走，估計港股短期都要炒住上落市先。
大巿昨日焦點之一，係大笨象匯控業績。雖然陸羽仁認為，大笨象已難回復昔日光輝，但佢始終有咁大市值，同埋有咁多股東，業績公佈完，大行紛紛發表分析報告。
大笨象靠息率撐住
高盛認為，次季收入、貸款減值及聯營收入均勝預期，惟經營開支較高，抵銷部份正面影響，維持買入。里昂則指，上半年貸款增長雖見改善，但收入增長仍弱，淨息差按半年收窄；加息周期有望提升收入，惟匯控的股本回報率仍將受制於9%至11%範圍，維持跑輸大市。
大行話匯控業績差過預期，有中環茶友就坦言對呢樣嘢睇得比較輕，認為大笨象有番咁上吓規模，加埋銀行業已變成受高度監管的生意，所以佢嘅業績唔叻得去邊，衰都唔衰得去邊。家有興趣買佢嘅股民唔係咁多，但由於佢息率有4.5厘，只要生意唔係太差，沽佢嘅人亦唔係咁多。
茶友話，如果港股直通車係七年前成功開出，又或者上海個國際板推出，可能好多內地股民有興趣買佢，可惜金融海嘯後，西方金融業露晒底，跨國銀行生意又因為各國加強監控令成本大增，好多國際銀行股變成無升無息，匯控呢幾年無升但有息，已經算是叻仔啦。
內銀累升多借消息唞氣
不過家個市炒緊中港股市融合，佢已錯過咗最靚timing，呢樣唔似再係大笨象強項，所以佢暫時都只能跟着大市升跌。
8月份起，人行又開始正回購，呢樣嘢對內銀股唔係咁好，加上呢個板塊累升唔少，所以近日表現有啲弱弱哋。
《上海證券報》報道，內地7月份新增貸款將明顯回落，金融機構整體新增信貸或不超過8000億元人民幣，而其中四大行新增貸款2100億元。受衝高回落影響，四大行存款亦將明顯下滑，四大行7月份存款將錄得負增長約1.5萬億元。
分析認為央行已表達了第二季度信貸投放過快的擔憂，第三季度很難再見到明顯放鬆空間，估計資金面將較第二季度緊張。受消息影響，內銀股表現都係麻麻。
陸羽仁
金融High Tea 舊文
