日圓效應
2014年11月06日
大市炒到醜股，真係有啲乏力，再加上日圓貶值，市民滿心歡喜換錢去旅行，股民就開始驚日本央行咁樣狂印銀紙，會掀起貶值潮，尤其中國受嘅壓力最大，咁就唔係咁「老嚟」，故此內地股市借勢調整，港股就一度跌近兩百點。喺日圓滑落陰影消散前，個市仲係唔可以睇得太好住。
對資產價格有壓力
日圓貶值被指為打劫鄰居，好似產業結構同佢相似的南韓，貨幣就即時受壓。不過，南韓點樣還招，相信都好難學日本仔咁癲，安倍家唔單止印錢買債，而係直接放出街外，買交易所上巿基金同房託基金，而且規模可觀。有茶友就笑言，日本印銀紙好似印公仔紙，就算要去日本旅行，使唔使換錢換得咁急呀？
日圓咁搞法，唔多唔少累到內地，本來人民幣下半年匯價轉番強啲，但家鄰國貨幣相繼下挫，人民幣匯價已經變相升值，對出口難免有壓力，咁啱內地經濟數據弱，匯豐中國10月服務業PMI跌至三個月低位，A股連升終止，上證指數收市回吐0.47%，累及港股曾挫逾兩百點，恒生指數收報23695點，跌150點；國企指數收報10622點，跌105點，成交672億元。
喺跌市下，濠賭股連續兩日被人質。澳門上月博彩收入曳，10月收入僅280億澳門元，按年減少23.3%，是歷來最大跌幅，銀河娛樂(027) 單日再插近3%，造50.85元；金沙(1928) 挫3.31%，報45.25元，兩者成為最大跌幅藍籌；細小小嘅新濠(200) 仲跌夠4.9%。今年頭開始，陸羽仁一直唔睇好濠賭股，認為行業至少出現一個中期調整，故此每次反彈都係減磅機會。月初濠賭股有過「死貓彈」，升得叫做唔錯，希望有貨的股民把握到機會沽吓貨啦。
高追遇集資喊都無謂
指數跌百幾點，幅度唔算太多，但個股壞消息就幾多吓。內地《第一財經日報》報道，中國外運(598) 母公司中外運長航，旗下公司負責人涉嫌配合出貨人擅自提貨及虛假出貨等，被公安控制，消息一出，觸發中外運股價洗倉式下跌，一度重創28%，低見4.26元，中午開市前停牌，停牌前仍大跌近13%，報5.15元，成交急增至10.56億元。
中外運早前公佈業績，不少大行睇好，突然爆單壞消息，股價急插，大行面目無光，曾經睇好的大摩即刻力撐，話有報道指母公司中外運航運出現管理問題，股份被拋售，令估值更具吸引價值。由於事件僅涉及母公司，未涉及上市公司，相信對中外運影響不大。由於中外運係當炒股，唔少基金有貨，呢次股價插得咁急，有貨在手者現水平無謂趕沽，至於係咪博反彈，就要睇你有無零錢炒吓囉。
另外，幾隻內地股都有抽水動作，搞到股價碌低。財險(2328) 宣佈供股籌近92億元，股價應聲下跌，收報13.82元，挫2.54%；母公司人保(1339) 都拖低咗1.77%，報3.34元。
仲有一隻深圳國際(152) 就配股集資，雖然全日穩守配股價11元，收造11.42元，但比上日下挫5%，呢個星期佢陰陰地升，原來係有動作，高追股民結果中伏，正如之前所講，估計集資公司會陸續有嚟，所以炒賣強勢股要多一重防範！
陸羽仁
金融High Tea 舊文
