魚樂無窮：奕達有異動似好事近
■鱷魚恤大股東兼主席林建名正洽售所持約五成股權，消息刺激鱷魚恤爆升逾八成。 資料圖片
年近歲晚，大市成交奀豬，但炒風不減反增。鱷魚恤（122）發通告，大股東兼主席林建名正洽售所持約五成股權，消息刺激鱷魚恤爆升逾八成，但現價0.99元較每股NAV1.61元，依然有近四成折讓，水位甚足，可候回吐入場。
鱷魚恤今鋪變相賣殼，證明殼股有價有市形勢未變，事實上，早前宣佈易手難產嘅萬威（167）又停牌，停牌前仲有春江鴨掃貨，再獲洽購呼聲甚高。今日推介嘅潛在殼股奕達（2662），亦似有聰明錢入場，值得跟進。
咪住，奕達都冇出過通告話賣盤，你憑乜話會易手先？睇清楚，主席兼大股東林志豪喺舊年全年業績通告時講，由於連續三年都冇錢賺，故可能考慮出售營運業績下嘅任何業務。集團主要提供印刷線路板及相關產品，受需求減少、原材料人工成本增加，蝕錢蝕到麻木，試問呢盤生意，邊會有人買？所謂出售業務，九成九係賣盤。
雖然生意麻麻，但從殼股角度睇，奕達絕對係正貨。最新市值6.3億，但淨現金達2.5億，扣減後同殼價五億仲有一段距離。再睇股東架構，大股東持股74.4%，夠曬集中，加埋連年蝕錢，集所有賣盤條件於一身，正呀喂！噚日大棍崛起，兼有成交配合，唔通月底公佈業績時有好消息？戰友們拭目以待吧。
唐牛
https://www.facebook.com/tongcow88
唐牛
魚樂無窮 - 唐牛 舊文
