賭沙蟹
2015年02月17日
今個星期港股得兩日半市，昨日只得500億成交，歲晚收爐味幾濃。不過，市場消息都幾多，大者有擔任九倉(004) 主席多年的吳光正宣佈退出董事局，正式交棒俾乖仔吳宗權，細啲有鱷魚恤(122) 傾話賣盤，股價暴漲逾80%！
彼得吳光榮交棒
會德豐(020) 系在馬年完成換馬安排，上一代宣告退出，過渡期由吳天海做「教車師傅」，扶助新老闆打理公司。
會德豐系以往有「藍燈籠」之稱，過往升到佢往往個市就玩完，所以佢高高掛起，咁就大件事嘞。
不過，自從自由行實施後，九倉旗下兩大商場海港城同時代廣場，變咗猛生金蛋的大肥鵝，自此該系股東斬斷窮根，發到唔清唔楚，由「藍燈籠」變成「紅燈籠」。
雖然自由行來港掃貨，等如送錢畀商場業主使，但九倉條水食得咁應，管理層都應該有功。呢兩年集團又喺中港大搞房地產，有人覺得咁遲先發力係「來晚了」，但至少暫時為止，佢喺香港高價投番來的地皮，都有骨落地，所以「彼得吳」已成功光榮交棒，將來點樣搞落去，就要睇下一代啦。
長和見回吐可吸
在換班消息下，九倉收報60.3元，升0.67%，會德豐收報42.85元，升2.39%。由於大市無乜重大消息，農曆新年又將至，投資者入市意欲低，港股高開35點後徘徊，上證指數全日反覆上升，升0.6%收場，恒指都受帶動，收報24726點，升43點；國企指數收報11934點，升12點，成交額由上周五的717億元，減少至513億元。恒指公司公佈季檢結果，長實(001) 及和黃(013) 完成重組後，長和及長地將於掛牌當日自動「染藍」，務求做到無縫交接。昨日長實及和黃兩股齊齊造好，長實收報151.5元，漲1.6元；和黃造104.2元，升1.3元，估計喺開股東大會前，兩隻股都會秩序良好，如果見到佢低番，入小小走下短線，或者有得收番封新年利是都唔奇。
呢類靜市最宜大鱷搞作，浩澤淨水(2014) 中途停牌，停牌前報2.63元，急瀉20%。有沽空機構Glaucus發表報告稱，浩澤淨水雖然有經營實質業務，亦有真實客戶，不過就質疑公司財務數據嚴重誇大，例如繳交稅款遠低過正常水平，認為每股只值0.27元至0.85元，給予「強烈沽售」評級。實情係點要睇公司如何回應。
鱷魚恤(122) 宣佈，控股股東林建名擬向第三方出售50.5%股份，股價復牌大漲。牌面睇，鱷魚恤帳面淨值有成1.6元，昨日股價收0.99元，雖然升咗好多，仍然同帳面值有距離。出現咁情況，主要係交易仲未落實，而且公司無講洽售價點計，有小股東寧願落車食胡先。
鱷魚恤未露底牌
鱷魚恤本身有經營成衣生意，可惜無乜錢賺，今次交易主要係反映資產同殼價。由於佢最值錢係物業，條數好易計，家暫時仲未知物業會點處理，若然係連公司出售，咁價錢一定唔會平，要每股1.6元淨值，再加4至5億元殼價，隨時要2元樓上，但另一個做法係將物業賣番畀大股東，咁情況就會複雜啲，亦會增加出售嘅難度，如果交易最後散咗，唔排除佢股價會大幅回落，呢個亦都係點解佢市價同淨值仲有咁大距離的原因。
至於同屬林氏家族的麗新系都炒高埋，其實兩位大少老早分了家，家借頭借路炒上，我係麗新股東就老實不客氣隊貨為敬，之後等佢回落先諗補唔補番都未遲！
由於買家現時已支付幾千萬訂金，顯示誠意。呢場交易有小小似賭沙蟹，若然手頭有貨的小股東，可以沽小小食胡，但最好留番部份在手，睇埋底牌。
至於家上車，表面仲有相當水位可博，但呢啲絕對係高風險賭博，買錯好易嚴重燒傷手指！
陸羽仁
金融High Tea 舊文
