金手指：梁耀忠禁月餅
■比特幣事件的苦主，早前曾向梁耀忠議員（左）求助。 資料圖片
二○一五年立秋之日。是日頭條「全港最大連鎖式餅店結業」，死因？故事起源喺兩年前，餅店換來新總裁，佢請咗某跨國顧問公司做策略報告，顧問公司因低息環境，建議餅店以成本價出售月餅。只要咁樣做幾年，市場佔有率會增大，令買貨成本下跌，最終逼使對手結業。
苦主求助議員的答案
顧問公司建議嘅另一個搶客方法，就係預售大量月餅卡，因永遠有人換餅換得慢，更有人好似孫柏文咁，因唔記得塞咗喺邊所以永遠唔換，變相無息借貸，可對沖加息風險。點知二○一五年夏天爆鴨流感同全球蓮子因真菌失收，價格飛升。分析員警告，蛋黃同蓮蓉將短缺，消息傳出，市民湧到餅店換月餅，搞到擠提，最後餅店被迫宣佈違約，單方面停止月餅卡滙兌，迫使月餅卡持有人換其他產品。
點知違約後，餅店餅卡賣出量急跌，亦因餅店槓桿極大，銀行們眼見餅卡業務爆煲，紛紛call loan。喺夏天最後一日，最後一位白武士宣佈退出拯救行動後餅店被迫即時全線結業。
有啲後生仔有見及此，想解決市民需要，喺crowdfunding網站，諗住集資出月餅。點知一post上facebook，搞手們即刻被證監徹查，話涉嫌非法集資，仲話永遠唔會close file，等喺未定罪前都先收阻嚇作用。但當證監被問到大型跨國企業出嘅「餅卡」係咪應被監管嘅衍生工具時，證監喺大企業律師團隊溫馨提示下話有待研究。
因呢次違約行動令好多苦主向議員求助。畢打街頭傳出「還餅、還餅、還餅」嘅長期佔領抗爭行動。最後梁耀忠及塗謹申陪同部份市民報案。梁耀忠議員喺幫人報案後見記者話，見咁嘅情況，最合乎邏輯，理所當然，就係強烈要求當局禁止月餅買賣。你可能話：「唔好老屈梁耀忠啊！」只要將月餅變比特幣就會係今時今日嘅香港。This city is dying？劊子手咪就係投票畀梁耀忠嘅選民囉。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
