電動車狂潮
2015/02/17 09:34:16
網誌分類: 經濟
昨日係美國總統日，美股休市。歐洲股市昨日受歐盟發動新一輪制裁俄羅斯行動以及歐元集團與希臘就債務問題的談判宣告破裂，輕微走軟。歐洲Stoxx 600指數中段最多跌0.3%，收市跌幅收窄至0.1%。其中德國股市跌0.4%，法國股市跌02%。外圍無大變，港股近放假，未來一日半的交易預料會較淡靜。
希臘財長與歐元區各國財長談判有關希臘債務援助問題，上星期傾唔完，昨日繼續，但開會唔夠4小時，已有希臘官員指出，已拒絶歐元集團一份提議草案，談判宣告破裂。有分析指出，看來近期內歐元集團和希臘難以達成任何協議，如果找不到打破僵局，那麼希臘將面臨「脫歐」風險。睇歐洲股市昨日表現，除希臘股市急跌3.5%，多隻希臘銀行股大瀉一成以上以外，整體都比預期穩定，而杜指期貨亦唔係跌得多，執筆時只係跌多39點，較上日現貨收市低水65點。歐洲股市昨日交投非常淡靜，Stoxx 600指數成交量較平日低少了35%，反映市場採觀望態度，固然美股休市，也有影響。
對於希臘可能「脫歐」，投資者反應唔大，相信係正如唔少分析已經指出，歐洲經濟及股市受過上次希臘危機的教訓，已經有所準備，築起防火牆，唔俾危機蔓延，固然啦，更重要嘅係投資者相信，希臘唔同歐洲「三頭馬車」合作，最受害的還是希臘自己。事實上，希臘呢段時期已經出現資金逃亡潮，昨日傳出談判破裂消息，希臘銀行業便如重巨鎚，希臘國家銀行（National Bank of Greece SA）, Piraeus銀行及Eurobank Ergasias都急跌超過 12%。而歐元匯價亦受累回軟，美元兌歐元跌近0.4%至1.133美元水平。
雖然希臘政府態度表現得好強硬，唔肯接受歐盟領袖提出的緊縮條件換取救助，但市場估計希臘政府最終還會同歐盟領袖展開新一輪會議，因為民主政府最終敵不過民意。昨日出爐嘅民意調查顯示，有大約81%的希臘人表示希望留在歐元區。
歐美股市上周之所以造好，其中一個原因係俄烏達成停火協議。不過，有報告指出，烏克蘭境內仍有不少革命份子不遵守最新停火協議，歐盟昨日表示，這些革命份子對烏克蘭的獨立，構成威脅，所以決定加強對俄羅斯的制裁，令到股市受壓。
另外講講蘋果，佢股價近期大漲，市值升到7000億美元咁誇張，正當市場疑懷緊蘋果股價能否再上，有何動力走向1萬億美元市值的時候，市場近期又傳出蘋果公司可能會生產電動車，呢個消費即時令到全球投資者非常振奮。最近嘅幾十個小時裡面，就先後有三份重磅傳媒，報導過相關消息，首先係英國金融時報Financial Time報導話蘋果聘請了專家成立了一個汽車研究實驗室，推測「正在研製電動汽車」；之後係美國華爾街日報，話呢個項目叫做「泰坦」(Titan)，已經有超過100人秘密地從事相關項目，仲話到架電動汽車屬Van類；路透社則表示蘋果正「研究製造一台無人駕駛的電動汽車。不過，路透社嘅報導同有華爾街日報嘅講法有矛盾，華爾街日報「話無人駕駛汽車不在蘋果計劃之內。」我都估主要係電動車而唔係google搞緊的無人車。對於上述似層層嘅報導，蘋果未有回應。
傳蘋果會生產電視機，但未有具體消息。蘋果造電視機，會比較靠近核心業務，斷估都應該係先造電視機，才再生產汽車。但點解忽然間傳出蘋果會生產汽東呢？有懷疑這只是蘋果的公關技倆，目的係維持投資者對蘋果公司前景嘅憧憬。
我唔係咁睇，蘋果咁巨型公司，要有突破，就要投身巨型行業，汽車業係一個好選擇。香港人唔太注意，美國的電動車Tesla，在當地十分火熱，最近殺入香港，在西環開了舖頭，唔搵代理，自己直銷。
Tesla的創辦人馬斯克（Elon Musk），被譽為真人版Iron Man，創意爆燈，又搞火箭又搞電動車，佢搞車10年，Telsa已大力衝擊美國汽車市場，Tesla被稱之為「汽車行業的蘋果」，有趣的是，過去曾傳出了蘋果要收購 Tesla 的消息。
一年前美國《舊金山紀事報》披露了蘋果高層與馬斯克見面詳談，「這次包含了兩家矽谷巨頭的會面，預示着一個信號，蘋果對收購 Tesla 很有興趣。」事後馬斯克彭博社話，會談確有其事，不過有沒有談收購就無可奉告了。如今《華爾街日報》披露消息話，蘋果總裁庫克批准推動電動汽車的計劃，也是在一年前，即係話蘋果同庫克談收購未成，就自己先開展電動車項目，估計庫克未開出讓心動的價錢，或者在合作發展方向仍有分歧。未來還不能排除蘋果會收購Tesla。
電動車係未來重大行業，近期因為油價低落而回吐，但香港炒電動車概念主要炒比亞迪，最近因為蘋果的消息也從低位彈起，我又睇唔到佢有好大發展空間，可能都係短炒。
陸羽仁
回應(6) 我想回應
陸羽仁 BLOG 舊文
