一周三件：361度平靚正
■買361度，預測PE平過行家一半，值博率高。 資料圖片
新春臨近，添置年貨、買新衫新鞋唔少得，祖國零售瓣數，揀隻平靚正搞，買361度（1361），預測PE平過行家一半。
361度除咗主打運動服飾同鞋類外，兼仲搞埋童裝瓣數。喺運動產品方面，兼有自家專業研發團隊，又攞到四十七項創新專利。而去到上年尾，集團喺祖國特許零售門店總數，上到七千三百一十九間。網購大熱，361度亦透過淘寶、天貓同京東商城等等熱爆電商，銷售產品。
定單增長佳前景看俏
睇到嘅係，361度運動產品技術設計創新，又線上線下經營網絡夠照，加埋大人勁捨得使錢嘅童裝，業務嘅彈力夠曬。同其他行家一樣，361度經過二○一三年經濟暗淡期，盈利大跌七成，到得番兩億元人仔後，但361度有條件有優勢，谷底翻身力度夠，嚟緊二○一四年成績單，已經有盈喜墊底。
踏入二○一五年又點？361度繼今年春夏定貨會，定單總額錄到11%增幅之後，秋季定貨會嘅定單，亦都比上年同期，增加咗16%，數據靚仔到痹。場內專業評估，361度今、明兩年EPS上到0.24元同0.375元，明年預測PE，由家陣十八倍跌到得六倍。行家安踏（2020）明年預測十二倍PE、中國動向（3818）更加上到24.4倍，361度平咗一大截。
361度去到上年六月時，揸現金三十四億元人仔，得銀行貸款一千六百萬元，就算計埋贖回CB金額，集團應該仲有二十七億元淨現金，折約三十四億港元，361度家陣市值幾多？都係四十七億元咁大把。係隻超級現金牛，有唔錯防風力之餘，隨著業績谷底翻身，派息可能會爽手啲。
買361度，現價（2.28元）翻半番到3.5元計，明年預測PE先得九倍，未有耐追到上邊行家。
錢雋
細價股專家
本欄逢周二、三、五刊出
錢雋
一周三件 - 錢雋 舊文
