異動空間：辦年貨咪漏衍生
長假前夕，相信戰友都忙於辦年貨唔得閒炒股，但早幾日魏力行過又一城，甫上電梯望向右邊橙色嗰間舖，就見到十幾廿個篋民，有啲努力pack箱，有啲攤開個篋休息，埋去望嚇就發現，接近三分之一都有買衍生集團（6893）旗下產品。
本地薑衍生主要賣BB健康產品，以及女性護膚品和清潔產品，受經濟周期的影響甚微，即使大陸通縮憂慮升溫，衍生應可免疫，屬抗跌力強的股份。現時代理、自營約六十個品牌的三百多種產品，自營產品包括少女OL喪買的美肌之志，BB必備的開奶茶、保嬰丹等；代理品牌則包括澳雪、雪完美、花世界、珍妮詩，全都是入曬屋的產品，最煞食係兒童保健品類品，二○一三年香港市佔率達53.6%，產品質素、議價能力毋庸置疑。
此外，衍生已建立的網絡亦相當值錢，在港覆蓋萬寧、屈臣氏等大型超市和藥房，去年零售網點達八百九十七家。內地市場方面，集團已與全國九個省份超過四十個分銷商簽訂分銷協議，挾本港品牌進軍內地，相信大有可為。現價買入博去番上市高位都有近四成水位。
魏力
http://www.facebook.com/2012jason
魏力
異動空間 - 魏力 舊文
