金手指：曾淵滄也入隊
■曾淵滄博士專欄上周在本報投資版獲最高收視，點擊率過十萬。 資料圖片
孫柏文同長輩周顯兄喺某本得百日歷史嘅周刊都有撰文。早排我一連寫咗兩篇文講我點解賣樓，用咗我偶像Niall Ferguson喺佢本《The War of the World》裏面講過嘅嘢做沽樓原因。
我其實真係寫得比較深，擔心冇人睇，點知令周顯喺佢上周本報專欄中用成篇繼續討論，仲要話：「若繼續留在香港打拼，別忘了我的忠告：囤積食糧，以備不時之需。」周顯講得出呢個忠告，即係我都講得好灰嚇，故我將會喺我facebook度分享當日原文，大家自己睇啦。
反對政府擔保三跑融資
講起我偶像，就要講曾淵滄博士！真係要燒炮仗慶祝，因上周本報投資版最高收視專欄，點擊率過十萬就係曾博士篇題為「三隻逢跌必買股票」嘅文。邊三隻？就係中移動（941）、中電信（728）等三隻電訊股，因「都是寶，應該逢調整低吸，耐心地等待未來驕人業績。」點解？因為大陸4G囉！熱烈歡迎曾博士加入大陸4G啦啦隊！
舊年我幾十篇文中，超過十分之一都係sell大陸4G及其概念股。今次曾博士加盟真係好似撕開我件衫，跟住喺我心口打咗支超大強心針！聽日一大抽電訊相關股出業績，包括做掛喺塔上4G接收器，我叫過大家不問價追嘅摩比（947），睇嚇有幾勁！
最後講三跑融資。我同獅子山學會堅決反對任何為三跑融資嘅政府擔保。班政府technicians屎橋王諗住咁樣繞過立法會，諗住自己好好嘢，行政方便。呢個就係點解香港呢部iPhone，喺回歸十幾年後今日唔work。Engineers留咗要立法會批錢嘅原因，就係要最有民意基礎嘅主體同意。因他朝三跑收入低，連啲債息都還唔到時，政府係咪嗰刻先老奉去立法會攞錢還債？若嗰日唔通過會點？又憲制危機？攞sovereign guarantee出來玩？你哋係咪黐線㗎？Amateurs，bloody amateurs。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
