魚樂無窮：
環保股超新星大爆發
■粵豐環保公佈靚仔業績，午後極速破頂。圖為集團主席李詠怡。 資料圖片
噚日推介兩隻盈喜股，都有唔錯表現，中國飛機租賃（1848）獲大和首予買入評級，目標價12.1元，相信業績後會有更多大行cover，re-rate潮一觸即發，戰友請把握最後上車機會。食髓知味，今日再向績優股埋手。主打垃圾發電嘅半新股粵豐環保（1381）公佈靚仔業績，午後極速破頂，大有機會成為環保股超新星！
「盈利升46%箒，有幾勁呀？」睇真啲，如果撇除一次性上市費用，講緊多賺八成，市盈率回落至二十五倍。「唓，龍頭光大國際（257）三十六倍，粵豐估值肯定有discount啦。」咁你又錯喇，睇下民營水務股中滔環保（1363），當年同樣挾著超強增長勢頭，最新市盈率去到四十一倍，比光國仲要貴，同樣情況落在粵豐環保身上嘅話，不得了！
粵豐乃廣東第二大及中國第十一大垃圾焚燒發電企業，市佔率分別為13%及2%，單以民企計更係廣東一哥，巴閉！眾所周知，阿爺撐環保事業不遺餘力，粵豐亦食住條水，旗下科偉垃圾發電廠進行技術改造，預計第三季恢復營運，全新湛江垃圾發電廠亦於同期啟動，未來數年盈利肯定幾何級數上升。粵豐舊年底上市後橫行超過兩個月，睇CCASS最新數據，首十大券商揸貨九成，盡收天下兵器格局，難怪大棍崛起後頭也不回，呢轉炒貨乾兼績佳，目標價由市場力量決定吧！
唐牛
https://www.facebook.com/tongcow88
唐牛
魚樂無窮 - 唐牛 舊文
