中環在線：富豪私人飛機
機艙設計鬥刁鑽
■唔少富豪嘅私人飛機，內櫳嘅要求都好奇趣。
英國皇儲查理斯早前被人發現，佢租用嘅私人飛機，連淋浴間都用上真皮同黃金，其實有錢人對私人飛機裏面嘅設施、裝潢一向要求多多。
據空中巴士商務機市場總監David Velupillai所講，私人飛機主人對機艙要求千奇百趣，有中國客最愛「空中竹戰」，另有歐洲客指定要用某種牛皮做梳化。
皮梳化指定山區牛隻
唔講唔知，空巴除生產民航客機，私人飛機亦係佢嘅主要業務。負責銷售嘅Velupillai講，現時全球共有一百七十部空巴私人飛機，其中廿部由大中華區富豪、企業或政府擁有。機主一般好低調，所以空巴唔可能披露太多客人資料。
最常見、體形較細嘅型號ACJ319，載客量約十九人，同廉航常用嘅A320客機相似，製造連機艙裝修，售價約八千七百萬美金（約六億八千萬港元）；空巴最近推出ACJ330，型號同國泰（293）飛歐洲嘅A330長途客機差唔多，飛機連機艙裝修，承惠兩億美金（約十五億六千萬港元）。
富豪口味獨特，機艙設計往往天馬行空。Velupillai透露，最難忘有歐洲客人要求喺機艙放置皮梳化，指定選用喺法國與西班牙兩國邊境Pyrenees（庇里牛斯）山區嘅牛，原因係嗰區草原冇咁粗糙，牛皮做出嚟比較滑，冇咁多花紋！
中國客就沉迷娛樂，「要求造圓枱，食飯時可以六個人一齊用餐；其他時間變身四方枱，方便打麻雀」。不過Velupillai話，其實大部份私人飛機都冇大家諗得咁紙醉金迷，好多富豪都要求設計到同辦公室一模一樣，方便佢哋喺三萬呎空中繼續工作。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
