好橋唔怕用
2015年03月24日
中美股市齊齊起舞，港股想唔升都唔得。同外圍相比，港股升幅都係溫和，上海九連升，昨日升咗接近2%，港股比較升幅都係不過不失，國企指數升幅都係差過內地，有啲奇怪係上証指數高收，但在港的A股掛鈎產品(ETF)有啲跟唔上，反映股民見內地升得咁多，唔敢跟車太貼的心態。
呢排好多大公司公佈業績，昨日輪到恒基放榜，恒地(012) 公佈，去年全年純利167億元，按年增長5%，每股盈利5.62元，基礎盈利為92.92億元，按年增長4%。要提一提係恒地計劃派末期息每股76仙，同時向股東十送一股紅股。
恒基今年內，共有7個市區住宅項目推出市場，連同尚存現貨，預計今年在本港可供出售住宅單位約有3200個，已預售未入帳自佔物業銷售金額約達65.26億元。地產公司業績好多時睇賣樓同入帳，一年數字唔係咁重要，要講係今年恒地再派紅股。
恒地再派紅股
有經常投資嘅朋友早排先講，四叔隻煤氣年年派紅股，加埋股息一年有12%回報，呢招雖然大人覺得係掩眼法，但似乎就好受市場歡迎。好橋唔怕抄，早兩年恒地李四叔將呢樣德政，用埋喺旗艦公司恒地之上，結果又真係使得，雖然地產股去年整體表現平平，但恒地就打入藍籌升幅三甲。
今年恒地盈利增長唔算標青，四叔照樣十送一紅股，除淨之後就可以睇到神奇作用係咪可以延續嘞。有人話，出名數口精嘅四叔送紅股惠而不費，而且仲有個好處，就係有部份人收咗紅股會賣出嚟，方便佢老人家收集，總之得閒就入市增持。
國指跟唔上A股
日前公佈業績盈利倒退的中石化(386) 績差兼發盈警，股價跌2%，本來油價跌對做下游產品的中石化應利好，但公司因為產品價格跌幅仲大，搞到業績唔靚仔。
財務總監王新華解釋，公司需要消耗早前高油價庫存，庫存價格已逐步在3月恢復至正常水平。中石化之前股價應升不升，顯示醒目資金已有預期，所以公佈後反而唔係跌咁多。不過，睇見油價仲係跌未定，中資三桶油股價又唔係跌咁多，暫時都未係留意時候。
中央近日對股市擺出友善態度，使股民放膽咗。人民銀行行長周小川話，內地資本市場會更加開放，內地股市再起舞，上證指數喺消息刺激下再創9年新高，市場憧憬將有更多資金流入，A股最終以近全日高位收市，上證指數收報3687點，漲70點；深成指收報12780點，漲235點。
兩市成交金額1.23萬億元，連續第五日成交破1萬億元。港股通股份中，中集安瑞科(3899) 升12%，表現最好。其次是山水水泥(691) 升8%，金山軟件(3888) 升7.8%。
喺中美股市造好下，恒生指數高開163點，由於缺乏買盤跟進，大市回順，恒指收造24494點，升119點或0.49%；國企指數收報12177點，升21點，成交金額918億元。
國家鐵路局啟動「十三五」鐵路網規劃方案徵求意見工作，鐵路基建股受追捧。中鐵(390) 收造6.83元，漲5%；中交建(1800) ，造9.97元，上揚3.5%，兩者是升幅最大首兩隻國企指數成份股。
市場憧憬內地進一步鬆綁樓市，內房股走高。中國海外(688) 升3.15%，造22.9元；華潤置地(1109) 雖然去年多賺不足0.1%，股價全日漲3.2%，造21元。
陸羽仁
金融High Tea 舊文
