【文亮言】 金管局迫業主賺股票錢（湯文亮）
我老婆鬧我話點解出壹週刊封面，又點解無端端講投資股票，我講的爆煲論已經全城熱爆，連佢都有不少朋友問她現在是否應該唔買樓，或者是只適宜買新樓，搞到佢好煩。又話我連股票都講埋，好似踩過界，陸東等一定唔Like我。今次，俾壹週刊封為新股神，仲唔大鑊。
我對老婆講稍安無躁，我買388完全是聽陸東講，當晚有十幾人在場，我是買得最少的一個，陸東才是股神，我是估神；況且我有對記者說是陸東叫我買 388，所以至於我點解唔投資物業而買股票，最主要的是我要遵從金管局指引。現在若果向銀行借錢，就不能夠買物業，收租所得的當然可以。如果唔買物業，就唯有買股票，所以，我訂下四大原則，就是公司債務不清楚股票，可能要作出巨大賠償股票、唔派息的股票、唔派息兼要供股的股票都唔買，還有，要流通量高，港交所是我認識的最好選擇。而我在澳門出生，直覺上港交所就是持有一個賭牌。澳門有三正三副，而香港只是得一隻港交所，點解唔買。
復活節過後，股市急升，有很多人在股票市場賺錢，政府為了打擊物業投資活動，其中一個原因就是金管局為了壓抑樓價，推出了七次逆週期措施，就算客戶符合所有 要求，金管局都唔主張銀行借錢給客戶買樓，但買債券，買股票就可以。間接地是金管局迫業主賺錢。雖然，很多人話，可以明修棧道，暗渡陳倉，向銀行借到的 錢，可以兜兜轉轉，最後用作買樓，如果係就大件事，現在，金管局查數，那些客戶不但因為將錢用作買樓而賺不到股票錢，還要還錢給銀行，我亦有朋友遇到這樣 的困境，問我如何處理，我真的是無計可施。
今次股市大升，有很多人錯失了機會，就是那些在過去幾個月耗盡儲蓄上車的人，置業後，已經沒有多餘錢買股票，甚至要將擁有的股票賣走才可以上車。不過，亦有一些準備上車的人。因資金不足，不敢貿貿然向財務公司借錢上車，唯有將手上的資金轉買 股票，在三月初，訪問我的幾位記者都有此困難，所以，他們問我買什麼股票，我亦早料到有此一著，當時給了他們一個號碼388，同時亦解釋買388的原因， 如果他們有聽從，今日應該可以賣股買樓。有時，一個號碼的確令人可以發達。我重申一次， 388並不是我想出來，是陸東。所以他才可以被稱為股神。
文亮言 - 湯文亮 舊文
