魚樂無窮：
如何解讀財爺丁蟹論
■財爺化身財演，噚日出blog話今日股市會裂口低開。 資料圖片
中證監上周五連環出招為股市降溫，勢凶夾狼，但事隔一日又澄清話唔係想打壓股市，正宗一啖砂糖一啖屎。一國兩制下嘅香港，又有財爺化身財演，幾日前話港股唔似會爆煲，噚日出blog又話今日股市會裂口
低開。阻人發達猶如殺人父母，面對股市㷫恰恰，中港領導層前言不對後語，潛台詞其實只得一個︰「股市係會升得好勁，但希望大家唔好炒得咁癲」。
睇番中證監年初出手打壓兩融，A股單日插水7.7%，但一星期後已經收復失地，港股仲勁，兩日後已經升凸；今次擺明資金市，撈底盤大排長龍，如果即日完成調整，唐牛唔會感到意外。上周五股仔繼續發威，超大（682）、威華達（622）等疑似變身股炒高二至四成，近年染指婚禮業務嘅老牌工業股嘉利（1050）亦大棍崛起，雙頭馬車推動下，更值得憧憬。
講工業主業，嘉利五金塑膠及電子專業代工業績理想，帶動中期盈利飆升1.3倍，夠實力！講婚禮業務，雖然仍處虧損階段，但管理層多番強調正致力扭虧為盈，相信離目標不遠，只要做到少少成績，成個構圖唔同曬，有憧憬。唔好忘記，中期盈利已超越去年全年盈利，發盈喜只係時間問題。一隻有實力、有憧憬、有盈利墊底、市值只得9億元嘅蚊型股，由舊年滬港通開車到而家，竟然冇升過，實在令人摸不著頭腦！
唐牛
https://www.facebook.com/tongcow88
唐牛
魚樂無窮 - 唐牛 舊文
