中環在線：
生力啤任飲 𠱁長情小股東
■現場設有兩部啤酒機畀股東任飲。
小股東去上市公司周年股東會（AGM），除咗為見管理層一面，多數為咗食番餐，啤酒股生力啤（236）最出名係股東會有免費啤酒飲，今年亦都唔例外，現場特設兩部啤酒機任飲，仲新增兩位啤酒女郎企喺宴會廳門口講「歡迎光臨」
，呢個股東會認真夠曬relax。
生力啤上星期五下晝喺金鐘五星級酒店香格里拉舉行周年股東會，現場所見，大約有過百人出席，大部份都有番咁上下年紀，特別多長者。
■生力啤今次安排啤酒女郎恭迎股東。 黃珮琳攝 
■何婆婆兩姐妹嫌生力啤派息少，好在有免費啤酒補數。 
■一袋袋啤酒紀念品整齊排列。 「以啤代息」
股東會開波之前，好多小股東已經斟咗啤酒，坐埋一邊慢慢嘆，雖然係用膠杯，冇玻璃杯咁冰凍，但係都冇損佢哋嘆啤嘅雅興。
股東會開咗半粒鐘，期間唔可以飲酒，但佢哋都好乖，耐心等到開完會先至再斟過，反正都係免費任飲，又志在同其他老股民摸住膠杯底吹水，都唔使心急嘅。
兩位何婆婆姊妹花呢日亦去湊熱鬧，雖然佢哋已經持有生力啤超過10年，但係竟然唔係因為愛佢。佢哋批評「呢隻股票冇乜好，派息又少，年年都有小股東爭取加派息，年年都失望」，「唯一比較著數就係可以喺股東大會飲番杯囉！」
翻查年報資料，過去10年，生力啤只有3年有派現金股息，舊年每股派2仙，即係每手2,000股，得40蚊股息咁大把。除咗派息少，生力啤亦冇乜人炒，過去10年，股價絕大部份時間喺2蚊樓下，上周五收報1.46元。難怪何婆婆怨氣咁大，咁點解又唔一早沽咗佢呢？佢就同好多散戶一樣咁話「買咗咁耐擺住先喇」！
臨走前，每名小股東都可以拎走一袋共8罐啤酒做紀念品，不過呢招「以啤代息」始終唔及派息咁實際，上市公司派息先至係「真正朋友」囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
