中環在線：馬時亨笑梁錦松老土
指做政治人物竟然無fb
■馬時亨（左）同梁錦松噚日唱雙簧，老友鬼鬼。 張柏基攝
香港大學噚日有一個「馬拉松」活動！講緊係商務及經濟發展局前局長馬時亨拉埋佢老友前財爺梁錦松，出席一個關於金融業發展前景嘅講座，兩人熟落到輕易唱雙簧，馬時亨仲笑梁錦松老土，做
政治家都冇facebook（fb）戶口，梁錦松即刻反駁，話自己唔係政治人物喎。
噚日呢場講座吸引超過100名大學生去學嘢，最有睇頭係身兼主持人嘅馬時亨點樣跟下屆特首大熱梁錦松唱雙簧。
梁錦松自稱失敗者
喺嘉賓討論環節，馬時亨係咁啄住梁錦松，笑佢唔用facebook，認真老土。梁錦松就解釋，擔心洩露好多秘密先至唔用facebook，馬時亨冇放過佢，話政治家係要識用facebook，梁錦松反應好快咁反駁，指自己唔係政治人物，馬時亨打蛇隨棍上話「你未係啫」，哄得滿場學生大笑。
講講嚇，梁錦松忽然謙稱，自己係一個失敗者，事關佢係俾人踢出政府（2003年疑涉偷步買車而落台），好識做嘅馬時亨喺呢個時候又出手，話「你邊係俾人踢走，你只係自己辭職咋」。
呢段一唱一和又輕易引起大家對梁錦松有意選下屆特首嘅遐想嘞。
查實梁錦松可能選特首呢個傳聞，一定唔係空穴來風，好似佢噚日聲稱「趕住開會」，但講座結束後，依然留低一陣，向傳媒講咗佢對政改嘅睇法，叫大家支持政府，背後一定有啲想法喇。
講番今次講座，梁錦松都講咗唔少對金融業嘅睇法，指香港背靠中國，其實係一個好大嘅優勢，唔明白點解部份年輕人抗拒返內地工作，又話香港金融業難以被新加坡、上海取代，不斷唱好金融業前景。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
