一周三件 - 錢雋 2015年4月24日
一周三件：津發蓄勢爆發
■天津發展蓄勢待發，有足夠條件追落後。資料圖片
華潤創業（291）獲資產重整，周一復牌即急急挾高56%。場內有資格搞注資重組嘅中資股，越來越少，加埋瘋狂資金市，所以，走去博一啲仲未鬱到嘅，chance面係越嚟越高，天津發展（882）就係其中一隻，正等蓄勢大爆發！
喺呢一潮嘅超級牛，中資重組係重點，除咗華創，場內嘅中糧油（606），同樣俾資金炒重組concept，兩日一支箭、一個月翻過一番。而津發一個月就升38%咁大把，集團揸咗21%嘅慢打鑼天津港（3382），同期都已經翻咗半番，喺資金市，津發已經夠曬條件狂追落後。
注資憧憬無極限
又津發係天津市政府嘅旗艦，喺對上兩年，津發中層控股進行重組，由原先天津市政府透過全資嘅津聯揸津發，變為中間加多咗渤海國資，同天津醫藥集團，去揸津發。天津市政府會唔會無厘頭，重整津發中層架構？去年9月，大孖沙高盛，就估津發或獲注入醫藥嘅瓣數。
做個參考，天津醫藥2012年時嘅盈利，高達23.8億元。係咁意以呢個盈利10倍PE計數，津藥價值，已經高達238億元，係津發76億銀市值嘅3倍！津發若果真係有注資，會好爆炸。
又場內窗口，深圳國際（152）市值283億元、上實（363）338億元，北控（392）924億元。津發係「京津冀」重策下嘅重要窗口，得咁細奀市值？津發係等阿媽湊大！
就當無注資可能，津發現價（7.23元）得0.7倍PB，津港已經上到1.2倍，而同系統嘅天津港（滬600717）2.6倍，上邊其他窗口，全部1倍或樓上，津發平咗一大截。
當追落後，津發翻半番去到10.7元，PB先啱啱追到最近磅嘅上實，但仲未追到上邊任何一隻股票。
錢雋
細價股專家
本欄逢周二、三、五刊出
錢雋
一周三件 - 錢雋 舊文
