中環在線：
趙國雄扮鬼扮馬 阿仔冇印象
■趙朗年紀輕輕已經係里昂旗下房地產基金投資嘅董事。 陳海威攝
長和（001）「樓神」趙國雄之子趙朗（Ronald），年僅28歲已經係里昂證券旗下房地產基金投資董事，成為地產界其中一顆新星。佢爸爸最出名係鍾意扮鬼扮馬賣樓，Ronald其實點睇
呢？最鍾意邊個造型呢？答案竟然係「冇乜印象」！
趙國雄一向形象百變，經常以不同造型宣傳新盤，經典扮相包括大俠楚留香、中東油王及賭神等等，多到數唔曬。當華華問Ronald最鍾意阿爸邊個造型？佢竟然話「冇乜印象」。再三追問之下，佢先勉強講到哈利電單車車手造型係「比較有印象」，原來Ronald根本唔知阿爸曾經扮過乜。
■哈利車手look 
■大俠楚留香look 
■騎師look 
■中東油王look 間中一齊食飯 拒講公事
Ronald解釋，自己十年前負笈美國讀書，當時互聯網新聞未有咁發達，喺當地冇乜留意關於阿爸嘅消息，連相都睇唔到張，所以對阿爸過往扮鬼扮馬造型唔太清楚。至於點解會對車手造型有印象，全因為阿爸鍾意電單車。佢都認同阿爸嘅做法，指賣樓唔使咁嚴肅，扮嚇嘢Casual啲，冇咁大壓力咁話。
講到兩父子關係，Ronald好坦白咁話，跟阿爸唔算親密，星期六、日都唔係成日見到面，平時間中會一齊食飯閒話家常，但絕對唔傾公事。佢反而同34歲嘅家姐、即係置富（778）行政總裁趙宇傾得埋，不時交流大家對地產市道嘅睇法。
原因係Ronald讀財富管理出身，一心諗住做投資銀行，之後機緣巧合入行做房地產基金，初時對物業市場唔係好認識，於是就向家姐請教，越傾越啱傾。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
