滙海探戈：
英鎊漸入佳境
環球經濟麻麻但各國奮勇放水下，股市繼續亢奮，香港家陣通街股神唔在講。歐美股亦唔輸蝕，連守齋15年嘅納指上周亦終於再創收市新高，只要升多三十零點，intraday高位亦要破。傳統智慧話股市預視經濟，斷估今次難靈驗，但執輸行頭慘個敗家，大家心態上都炒咗先算。
聯
儲局本周又議息，事先張揚下大家預咗息口唔變，6月定9月開始加息，先至係焦點所在。美國近排數據無之前咁靚，繼上月新增職位大減後，核心耐用品定單錄得逾兩年最大跌幅，加上強美元對企業盈利的影響浮現，大家都好關注，今次會後聲明會否就幾時加息作出較明確提示。有儲局傳聲筒之稱的《華爾街日報》記者Jon Hilsenrath上周話，儲局官員關注強美元對當地經濟的影響，加上本周出爐的首季GDP應麻麻，儲局班高官近排口風淡番，估計6月加息呼聲應該唔高。
挑戰100日線
儲局落實加息前，美滙指數料繼續在95至100間上落。雖然希臘繼續跳草裙舞，但歐元仍硬淨，上周在1.06至1.09美元上落，估計希臘單嘢塵埃落定前可繼續炒range。日圓則在118.5至120邊兌1美元徘徊，維持吼位逢高沽策略。相對上，英鎊上周表現漸入佳境，主因英倫銀行會議紀錄顯示，理事對息口前景看法唔係市場估得咁鴿，刺激英鎊上周升至1.5191美元的七周高位，短期受首季GDP數據及大選因素主導，技術上將挑戰100日線。
奇兵
本欄逢周一刊出
奇兵
滙海探戈 - 奇兵 舊文
