魚樂無窮：方正谷底反彈起勢衝
■方正控股屬於禾稈冚珍珠一族。 資料圖片
一本通書不能睇到老，此話何解？好似炒股咁，盈喜股固然係好，但盈警股都會有寶藏，今日推介嘅方正控股（418），就屬於禾稈冚珍珠一族。
「咪住先，舊年盈利喪插九成，點睇都係肉酸到爆喎！」咁講就大錯特錯，事關公司上半年蝕近3,000萬，但全年竟可扭虧賺逾600萬，意味下半年賺近4,000萬，說穿了又係假盈警，更加係谷底反彈型，難怪股價不跌反升，見底了！
「低位升?兩成喇喎，仲有得去咩？」作為一隻軟件股，方正控股今年暫升約四成，睇睇其他同業，金山軟件（3888）、金蝶（268）、擎天軟件（1297）及暢捷通（1588）平均升八成，方正落後程度令人咋舌。
睇估值，更加得人驚，方正現價市賬率僅0.8倍，上述同業中，最平嘅金蝶講緊4.3倍，最貴嘅擎天更加逾6倍，方正變相折讓八成，要追番同業平均估值5倍，講緊要升6倍。
有冇呢個可能性？方正喺最新業績報告表示，將會強攻大數據業務，仲豪擲過千萬增加人手，實食無黐牙格局。最重要係，方正市值僅7億元，比起其他全部數以十億及百億同業計，可塑性明顯最高，一旦有聰明資金相中，肯定掃到甩轆，以其平到震估值計，就算升1倍都唔過份，卻已經好和味。
唐牛
https://www.facebook.com/tongcow88
唐牛
魚樂無窮 - 唐牛 舊文
