中環在線：嘲林小珍剋老爺餘波
周嘉儀寸嘴 疑似對話曝光
■疑似周嘉儀與同事嘲諷林小珍剋死老爺的對話，對話框有Ka Yee Chow的名字。 
新聞小花之間嘅是非，隨時多到可以寫番部電視劇！大台小花林小珍早前大爆，指剛轉行做興證香港市場拓展聯席董事嘅周嘉儀，曾嘲笑佢剋死老爺，周嘉儀隨即回應話自己冇咁黑心，但噚日有一張疑似係周嘉儀與舊同事對話嘅截圖流出，上面見到有人話「一結就剋老爺」，對話與林小珍所講脗合。
呢張截圖疑似係周嘉儀與舊同事，今年1月透過公司內聯網一問一答傾偈，上端寫住Ka Yee Chow，應該係由佢回覆。
■周嘉儀於WhatsApp回應「謝謝關心」。 
■林小珍 周嘉儀粉絲力撐
圖中有人話「唔係咁快老公出去偷食掛（啩）」、「一結就剋老爺」、「唔方唔沖、死快D（啲）」；跟林小珍之前喺facebook話該名女同事猜測佢丈夫偷食、老爺被咒「死快點」雷同。
華華噚日下午搵周嘉儀回應，但佢電話冇人聽，佢同事話佢忙於接受訪問。咁又係，噚日港股爆升，佢喺證券行返工當然忙喇。
後來華華將呢張截圖傳畀周嘉儀，佢透過WhatsApp回應話：「不想沒完沒了，沒有補充了」、「不再回應這事了，謝謝關心」，但佢就冇否認呢張圖係假嘅。
小花之間嘅是非確係沒完沒了。雖然周嘉儀負面消息纏身，但暫時好似都冇影響到佢，好似佢一開facebook專頁，唔夠兩星期，已經有超過1.6萬個like，唔少粉絲仲撐佢，話無論有咩人批評佢，都依然會支持佢咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
