地球無限大
2015年05月20日
內地大批新股集資，市況稍為冷卻，跟住指數又再上升，雖然人行依然停晒手，無進行逆回購，但股民信心依舊。中環茶友話，阿爺呢邊喺銀行放水，嗰邊喺股市吸水，以股換債，看來暫時操作順利。
內地股市強過港股，本地繼續受五窮因素影響，成交麻麻哋，但個別板塊就
跟住內地炒，最典型係科網股，由龍頭騰訊(700) 帶起，加上馬雲喺香港不斷搞併購入股，好多概念股相繼炒起，好似隻銀泰商業(1833) 一聲換人，股價就連日攀升，成為最搶鏡股份。
輪炒科網概念鬥誇
科網股呢輪係咁炒，由龍頭帶起一浸浸炒落去，喺內地叫做板塊連動，炒家揀不同板塊落手炒作，跟住由大股、二線股、細股炒落去。本地科網股炒龍頭外，近日開始炒港A股，即係同內地A股概念對應的股份，好似隻網龍(777) 呢排狂升，主要係內地A股近日開始炒網上教育股，內地有隻叫全通教育的股份，炒到飛沙走石，市盈率超過四百倍，網通有搞網上教育，於是就爆咗上去。
另一個例子係酷派(2369) ，之前好多人話佢唔得，依家炒起上嚟就話就佢有無限契機，可以轉做互聯網公司，提升業績，如果係咁想像空間就大啦，又話A股有呢類「可穿戴」概念嘅股票可以值一百元，依家只係造緊三元，內地股民呢種炒股嘅發揮，誇張到好難接受，只能用「地球無限大」來形容！
炒港A股之餘，好多二線科網股都被人跟炒，包括金蝶國際(268) 、中國軟件(354) 、金山軟件(3888) ，呢批第二梯隊都升晒。睇指數上上落落，但係軟件股浪接浪炒落去，好似金山升升吓差唔多去番最高位，基本上呢批股份都唔係咁跟大市升，這個就係內地炒板塊的玩法，股民適應新資金的投機方式，在資金未見大舉流入下，或者都可以發掘到搵銀機會。
滬深股市發力飆逾3%，上證指數重返4400關，帶挈港股反覆造好，恒生指數收造27693點，升102點；國企指數收報14191點，升265點，成交金額1360億元。
中資金融股為升市火車頭，交行(3328) 係表現最佳藍籌，全日升2.9%，造7.83元；國壽(2628) 彈2.8%，造37.7元；新華保險(1336) 仲靚，升4.5%，造51.4元。
A股抽升，加上華泰證券(6886) 招股，帶挈多隻內地證券股向上，海通證券(6837) ，揚6%；中信證券(6030) 漲3.7%，造33.1元。本地薑惠理(806) 截至今年4月底的管理資產總值達170億美元，按年大升70%，股價最高曾見14.64元，創上市新高，收報14.44元，升9%。
小心毒股一掂即死
熱爆新股華泰證券H股(6886) 首日招股，據11間證券商為華泰借出762.2億元孖展額，相當於公開發售集資17.36億元計，超額認購近43倍。當中有兩間已借爆孖展。
受華泰H股招股反應熱烈刺激，華泰A股(601688)漲停板，停板前報30.04元人民幣(約37.52港元)，H股招股價範圍20.68至24.8元，較A股折讓擴大至34至45%。
最後講多兩句隻恩達，呢隻股喪升變咗紅底股一陣後急插，連日反覆下挫，昨日八連跌再度插低，呢啲貨源極度集中股份，有人叫佢做妖股，呢個稱號唔多貼切，其實呢啲股應該叫毒股。好多人見佢急插，諗住兜底短炒走人，點知佢其實就係搏你貪粒糖，買就即艇，毒到一掂即死。
陸羽仁
金融High Tea 舊文
