異動空間：滿手蟹貨點撤退
壞消息浪接浪，恒指已確認跌穿雙頂頸線，對落首站可見26200點，此刻可做的是逢反彈減持，多儲彈藥等撈貨，目前時晨未到，只能耐心等待。昨文寫到沽貨食糊的技巧，今日不如分享嚇市況轉弱時，順利撤退的關鍵。要撇，最緊要快，戲院失火，最先奪門而出的人多數能全身而退，最
多只會輕傷，「魏Sir，個市跌一浸又反彈喎！睇多陣得唔得？」可以，但閣下之後只會更為狼狽，走得甩都元氣大傷。
個人一般做法是：股份或指數跌穿重要支持位，即掟一半出街，直沽不排隊。穿位後通常有後抽（好似今日），再沽四分一；最後四分一，留待跌穿前低位即沽。越怕輸，只會輸得更甘；越遲沽只會為其他人提供逃生門，自己則壯烈犧牲。假設閣下揸十隻股票，大中細股樣樣有啲，應點沽法？魏力習慣是先沽買賣盤最疏的股票，多數是細價股，因一旦恐慌性拋售呢類股可以逃生無門，即係無曬買盤。舉個例，早兩日大跌市，如閣下手持北青傳媒（1000），全日成交得一、兩百萬銀，bid ask可以相差廿幾三十格，直掟落去就硬食3%以上，跌市時可謂易進難出，宜優先處理。
魏力
http://www.facebook.com/2012jason
魏力
異動空間 - 魏力 舊文
