魚樂無窮：跟呂志和撈底買嘉國
■嘉華國際主席呂志和月初連續五日撈貨。 資料圖片
港股悶到發慌，成交得番800幾億，大時代半日都唔止呢個數，戰友笑言，一萬幾千過眼雲煙日子已過，而家一千幾百都要盡擸！
四叔李兆基乃股權披露常客，三日唔埋兩日就見佢掃恒地（012）同新地（016），貫徹佢「
買地產股好過買樓」嘅理念，但這種落街買餸式掃貨動作，拉勻一生計，對散戶指標作用不大，相反，平日好少入市嘅大孖沙都出手，啟示就大得多。
嘉華國際（173）主席呂志和，喺月初股災期間，連續五日撈貨，平均作價介乎3.82至4.13元，大約使咗4,300萬。翻查資料，呂志和上次真金白銀買嘉國，已經係2011年嘅事，之後股價係點？兩年幾升咗三倍，點石成金也！
仲有，旗下澳門賭業旗艦銀娛（027）由高位喪跌六成，但呂志和一毫子都冇買過，但嘉國一半都未跌夠，佢就已經出手，邊隻係寶一目了然！
事實上，嘉國近期賣樓成績有目共睹，無論係獨資嘅嘉悅，抑或同信置（083）合作嘅帝景灣，都賣過滿堂紅，保守估計套現數十億；旗下位於上海嘅豪宅項目嘉禦庭及嘉天匯，平均每平米賣近10萬人仔，屬天價級數，去貨速度甚快，預計套現同樣數十億，未來業績已有保證。現價市盈率只得6.5倍，兼有3.5厘息打底，呂志和連環出手，變得有根有據。
唐牛
https://www.facebook.com/tongcow88
唐牛
魚樂無窮 - 唐牛 舊文
