魚樂無窮：如何從iBond搵甜頭
■今年iBond認購人數高達60萬。 資料圖片
今年iBond認購人數高達60萬，破盡紀錄，由於採取派啤牌方式分配，一人最多只得兩手，唔好彩嘅更要做一手黨。僧多粥少下，究竟點樣可以喺iBond搵到甜頭呢？唯一方法就係喺二手市場掃！
翻查資料， iBo
nd喺2013年同樣熱賣，當時總認購人數52萬，同樣最多只分得兩手。該批iBond上市時，首日最高曾見103.3元，低位則為102.8元，收市報103.2元。簡單計計數，保守估計通脹率為3厘，如果當時喺二手市場用103元掃貨，相當於第一年冇息收，但之後卻每年穩袋3厘息，扣除使費後，都一定正過做港元定期，以其超低風險計，實在係超值價。事實上，該批iBond4個月後已經升番上105元，每手有兩蚊執。
「咪住先，對上一批iBond第一日最低只係得104.3元咋喎，今次肯定唔會咁平啦。」會唔會再有超筍價我唔敢講，但好多人當iBond係新股咁玩，就肯定係不爭現實。市面上唔少證券行及銀行都提供N免優惠吸客，只要拎住張身份證就入得飛，由於慳得就慳，呢批短炒客多數喺第一日就掟貨，造就錯價情況出現，今次認購人數比2013年仲要多8萬，兼且股市冇運行，速食者相信只會有增無減，超筍價再現絕對不是夢。
8月10日上市日，大家金睛火眼睇實吧！
唐牛
https://www.facebook.com/tongcow88
唐牛
魚樂無窮 - 唐牛 舊文
