金融High Tea 2015年7月30日
新興市場退熱
2015年07月30日
臨近月尾，又係衍生工具結算日子。經過黑色星期一大插後，中證監喺新加坡A50指數期貨今天結算前三度發言維穩，昨日午後「國家隊」仲入市掃貨，刺激滬深兩市雙雙拉高，上證更急升至近三千八百點，大升3.4%，接近全日高位收市。睇嚟阿爺唔俾淡友在外圍搵水，要夾死淡倉收場。
內地報復式升市，可惜港股又係跟升唔夠力，上證指數全日收報3789點，升126點或3.44%，但恒生指數收造24619點，只係升咗升115點或0.5%；國企指數收報11273點，升100點或0.9%，遠遠跟不上大陸升幅，成交明顯縮減至860億元。
金磚四國甩甩哋色
港股有兩個理由跟升跟唔足，最直接當然係香港無國家隊落場；另外，市場觀望美國議息結果，都令投資者唔想咁快落注。聯儲局會唔會喺9月加息，會後將有啟示。今年美息向上機會增加，美元向上，已令新興市場貨幣同經濟受壓。美資大行同評級機構都開始表示關注。
亞洲同新興市場貨幣回落，南美、亞洲影響好明顯。評級機構標準普爾就質疑曾經係金磚四國成員之一的巴西。標普表示，巴西一系列貪腐調查，若進一步妨礙增長和調控措施落實，巴西貨幣雷亞爾可能在未來一年失去投資級評級。消息公佈後，巴西雷亞爾兌美元下跌2%，創咗12年新低，但其後雷亞爾匯率回穩。
除標普外，美資摩根士丹利就提出，亞洲新興市場貨幣今年紛紛貶值，源頭之一係帶動區內經濟的中國增長不繼。大摩認為，如果內地增長減慢，將會持續對區內帶來壓力，同埋影響資金對區內市場的興趣。
大摩對美國以至西方資金流向有相當影響力，佢從睇淡中國的宏觀角度吹起摩笛，係佢擅長吹奏嘅老調。西方熱錢三幾年就喺新興市場執番劑，嚟完又走，進出提款，如果美國加息，都不可不防大鱷又會嚟料。
同大摩相反，高盛做咗中港股市好友，仲不時推介個股。佢最新發表對中航科工(2357) 的報告，維持「買入」評級，目標價由6.3元升至8.5元。
報告估計，旗下中航電子因新研發設施拉高成本，將2015至2017年純利降1至11%。不過，中航科工公司受惠快速增長的民用直升機市場，估計該市場會在二十年內由現時三百架增加至六千架直升機。同時公司潛在獲得母公司注入高盈利的非上市航空電子資產，成為未來利好因素。
中航科工係軍工板塊中的熱炒股，佢走勢好得意，好多時有好消息佢未必郁，無好消息就炒一下。呢排個市咁波動，想買最好都係等過埋月底睇睇有無機會低吸。
發展商樂見代理大戰
股市波動，樓市近排有啲撻訂盤出現，地產商推盤稍為減慢外，整體影響未算好嚴重。內地代理Q房網挾資金來港，搶人搶舖顛覆代理市場，打破中原及美聯龍頭行寡頭壟斷局面。該行給予高於傳統一倍拆佣搶去大批人手，接連開行迅速霸佔龍頭地舖，掀起一場挖角風雲。
過去本港代理主要由中原、美聯兩大集團佔最大市場，特別係新盤銷售向大行傾斜，大型代理議價能力極高，本地好難有人可以走出來挑戰。Q房網由內地來港爭位，據講藉高佣兩三個月搶咗近五百人加入，高速開逾四十間分行，落本搶市佔率。現時兩大代理只有美聯上咗市，咁多年除咗沙士外，生意都相當唔錯，仲吸引咗大陸水爭位。內地企業做生意出名爛做，如果佢哋鋪個網鋪得咁上下，下一步必然係攻一手盤，照計發展商都樂於增加競爭，呢場大戰相信都唔會咁快分勝負。美聯(1200) 昨收3.41元，在一年低位俳佪，暫時無乜運行。
陸羽仁
金融High Tea 舊文
