中環在線：香港做好準備工夫 只等中央撲槌
李小加為深港通戴頭盔
■李小加噚日一聽到記者問「深港通」，即刻戴定頭盔，話萬事俱備，只等消息。 設計圖片
港交所（388）噚日派半年結成績表，除咗問業績之外，行政總裁李小加都預咗記者一定會問深港通進展，無他嘅，原本話會上半年宣佈，下半年開通
，𠵱家8月都唔見影，似係戴定頭盔，免日後被追究。
小加都準備充足，每逢聽到「深港通」三個字，佢就會話香港準備工夫已經做曬，暫時未聽到監管審批消息，一有消息就會公佈，「還在等待」，純熟到有啲似錄音機上身。
講到聲沙 同事即遞水
可能佢都明白如果唔解釋明白啲，市場會杯弓蛇影，於是佢主動透露未來幾個周末，陸續同券商進行系統測試與公佈參數，「明確告訴大家，這都是正常的市場準備工作，如果不準備，這幾個星期也不能幹別的」，「請大家不要作出其他任何的解釋」。
曾經話港交所只係二老闆嘅李小加，相信今次唔單止面對香港證監會一個大老闆，仲有北京呢個大大老闆，份工又真係唔易打嘅。最好就係有班好同事搭救，好似噚日小加講到聲沙，咳咗兩聲，環球市場聯席主管羅力（Romnesh Lamba）好紳士，同環球結算業務主管戴志堅接力，遞杯水畀小加潤嚇喉。
雖然深港通未有消息，港交所純利就做得唔錯，按年大升73%，係歷來最好嘅半年結，照計小加應該飲得杯落。
但噚日喺會上佢就稍為有啲沉唔住氣，話「唔知《蘋果》條標題會寫『最佳半年純利表現』還是『遜預期』呢？」嗱，呢嚇就證明小加好捧場，有睇《蘋果》即時新聞嘞，事關《蘋果》即時新聞嘅標題係「港交所多賺73%遜預期」！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
