中環在線：太子鄧買洋房避高鐵
嫌工程嘈 購紅山半島「踎」
■鄧鉅明買咗紅山半島，諗住做「spare屋」；旁為妻子宣宏雁。 資料圖片
高鐵超支兼延期，住喺附近九龍站豪宅凱旋門嘅太子珠寶鐘錶老闆鄧鉅明都話，支持唔住樓下沙塵滾滾，晨早流流又嘈喧巴閉，最近花9,200萬元買入華懋與信置（083
）等發展嘅大潭紅山半島一間3,000呎大屋作為「spare屋」，話「如果再嚴重啲，忍唔到，咪搬去spare屋到踎！」
■紅山半島對正赤柱海灣，環境寧靜。 資料圖片 
9,200萬買入 當係「spare屋」
「太子鄧」鄧鉅明近年買親樓都賺錢，好似住緊嘅凱旋門至尊門近2,000呎豪宅，佢2009年以9,980萬元買入，家陣市值2.3億元，升價逾倍。
今次入市，佢坦言：「我3年冇出山喇，今次出番山，係因為樓下工程，搞得混亂，所以買多間做spare屋。」佢認為紅山半島每呎3萬幾蚊，但環境寧靜，對正赤柱海灣，好抵買，又話「十億八億，我就畀唔起，幾千萬，我就畀得起」。
講到高鐵工程，佢都好無奈，「我唔知佢幾時會完工，等咗成4、5年」佢狂呻，指工程搞到空氣差，朝早8點，打開窗就聽到聲，「你話冇滋擾就假」。好在佢早上10點出門口返工，夜晚8、9點返到屋企，工程停咗，滋擾極都係兩粒鐘。「但如果再嚴重啲，忍唔到，咪搬去spare屋度踎」。
佢睇過好多豪宅，最終選擇紅山半島，其中一個原因都係要睇自己嘅能力。佢笑住話：「人哋啲靚嘢，成十萬蚊呎，你點買呢？你睇自己荷包吖嘛。」佢好「謙」咁話，唔係好有錢嘅人，只能買1億元以下嘅樓！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
