魚樂無窮 - 唐牛 2015年8月18日

魚樂無窮 - 唐牛 2015年8月18日


魚樂無窮：三個月後始見真章


■筆者問身邊戰友，十個有九個已沽咗新iBond。　資料圖片

問身邊戰友，十個有九個已沽咗新iBond（4228）。無他，股市越來越難贏錢，有得食梗係食咗先，以免夜長夢多。今日推介佳寧娜（126），起碼要等三個月先落鑊，冇耐性嘅戰友，不妨轉看其他專欄……一日咁多啦。

點解係三個月？一切要從舊年11月嘅通告說起。話說佳寧娜舊年初開始研究搞分拆，經過一輪研究，舊年11月宣佈，分拆食品餐飲業務，會較物業投資發展更佳，因為前者上市估值可較後者高。但股東們咪開心住，由於當時剛收購「味皇」連鎖餐飲業務，預期需要更多時間造大造強，故決定一年內不會進行分拆。數數手指，仲有三個月就到11月，佳寧娜「不分拆令」屆時就會解封。究竟公司呢9個月有乜變化呢？睇睇業績，截至3月底止全年盈利下跌38%至1.2億，主因缺少出售華南城（1668）股權一次性收益所致。食品餐飲分部業績升34%，進度良好，現價市盈率8.6倍，息率3.6厘，以概念股來說非常吸引。集團7月宣佈，原行政總裁陳尚禮因個人原因辭任，由資深公務員梁百忍接替，後者曾任駐粵經貿辦首任主任，促進香港商界於廣東與鄰近四省嘅關係，有梁百忍加盟，佳寧娜內地業務可謂如虎添翼。又大股東馬介墇7月曾多番增持，平均價介乎0.783至0.86元，與現價相若，小注入場揸中線，話唔定有驚喜。

唐牛
https://www.facebook.com/tongcow88

唐牛
魚樂無窮 - 唐牛 舊文