金手指：QE4指日可待
■環球股市動盪，相信聯儲局將會好快話唔加息，跟住宣佈量化寬鬆QE4。 資料圖片
喺呢啲大跌市日子，孫柏文覺得最好就係退一步海闊天空咁環顧四周，睇嚇啲基本因素同價位，先去預測會點同埋應該點做。如論基本因素，大家都知全球經濟大鑊，齋睇原材料價格就知。有如太陽運行般
可信嘅中國經濟增長神話幻滅。而對香港資產最大鑊地方，就係共產黨全能操控嘅形象，亦都爆破。因2009年四萬億貸款，現以被摧毀變曬呆壞賬，你而家冇得再加大貸款。所以降準、減息就算做咗，銀行都唔畀放錢出去。
美國好快話唔加息
就係因呢批大到能天滅中共嘅呆壞賬，我就想講嚇股市價位。呢排睇行家嘅文，特別係股榮兄寫嗰啲都講話港股市盈率冇泡沫過，大牛市時恒指市盈率都係十幾倍鬆啲，比起2007年32000點嘅廿幾倍差得遠。但我想提提呢個情況有如2007年花旗國。當年佢哋啲銀行都係單位數字市盈率，花旗國財演都大叫抵買。最後出事時由單位數字市盈率跌到執笠。所以講到恒指市盈率，不如大家試計嚇大陸呆壞賬差到所有恒指成份股中嘅大陸金融機構零盈利，嗰個恒指市盈率又會幾多？我都唔叫你假設若個個蝕到趴街會點。
咁印鈔呢？日本印、歐洲印、大陸印，但要受嘅結果就係只要信心一失，你個貨幣可以崩潰。IMF已話你冇得做儲備貨幣，少咗啲儍仔買你，咁大陸人又鬱啲走資你冇得搞，起碼唔可以高調咁做。
當然你個貨幣崩潰係要睇兌咩先得，咁當然就係兌美元。故大陸、日本、歐洲等，只要美元一齊印，大家就可以維持貨幣穩定嘅假象。咁連原材料都冧價，即最後會引發通脹嘅原因都暫時冇埋。故我相信聯儲局將會好快話唔加息，跟住見到無阻全球大冧市後，宣佈量化寬鬆QE4。冧市先能有量寬，但冧市會好快，金銀價硬都係因睇到會再量寬。所以跟劇本，QE4指日可待。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
