無人托市 謀定後動
2015年08月25日
上星期股市破底而下，昨日再插1100點，即是話股市穿底，大幅下插，若然上次恒指單日跌幅2000點係股災，昨日收市比呢個低位再低千幾點，今年有買貨者，基本上都會扮蟹。傳聞中央喺咁環境下，都暫停郁手托市，股民只能自求多福。
傳中央未出手救市
全球股市大插，A股跌幅呢舖仲勁過香港。陸羽仁收到風，中央喺咁凶險嘅環境下，昨日未有出動真金白銀救市，昨日下午彈咗一彈都只係市場反應，和中央出手無關。唔知阿爺係咪想睇定啲定係頂唔順，佢一收手，滬深指數跳水式下插，港股同步急插。
喺咁環境下，個市又插咗唔少，散戶?家出貨可能遲咗啲，但撈貨有可能即時捱價，可以做的事情好有限。經紀張話，昨日都唔多人接貨。
?家個市好大程度睇美國聯儲局點反應，若然美國延遲加息，咁情況會好啲，個市有可能反彈，?家全球環境立立亂，呢個機會都唔細。
有中環茶友之前減咗小小磅，?家跌市佢唔算太傷，就話最好就係望美國股市大跌，個市解脫式下跌，咁仲反而有機會見底喎。
茶友話，自己手頭有貨雖然唔多，但個市咁插佢都要損手，佢有子彈但暫時仲未敢出手撈貨。茶友分析係，最怕美股上星期插完反彈，因為如果美股反彈，咁美國隨時照加息，咁中港股市好煩嘞。相反，如果美股大插，插到聯儲局腳軟，或者美國唔敢加息住，咁反而個市有機會有個像樣的反彈。
茶友話，若然美股回穩，港股有得彈，彈幅都唔會強，因為彈完又驚佢散；若然美股再跌，港股當然無得升，所以佢?家有子彈都唔敢亂用，就係呢個原因。
我就話內地都似有啲政治鬥爭，貪污集團似在反撲，亦影響內地投資氣氛。
個市呢排真係頭頭碰着黑。人民銀行未有如市場預期下調存款準備金率，加上南北韓軍事衝突，再撞埋美國下月或將加息，上證指數急挫8.49%，錄得八年來最大跌市，港股跟外圍跳水，恒生指數收報21251點，大跌1158點，連跌七日，累瀉2767點或11.52%，險守去年低位，國指大跌5.8%，跌穿一萬點大關，成交增至1390億元。
藍籌股近乎全軍覆沒。匯控(005) 挫4.3%；港交所(388) 失守180元關，大挫7%，報178.3元；中信(267) 半年多賺五成，並計劃下月公佈房地產業務整合方案，全日倒升0.29%，收13.96元，是藍籌唯一錄得升幅。
A股暴瀉，中資金融股沽壓重。中信證券(6030) 大跌9.6%，報17.04元；海通證券(6837) 仲慘，瀉足11%，報11.02元，中信證券與海通證券是表現最差國企指數成份股；國壽(2628) 挫5.5%，報24.3元，不過又係嗰句，中資金融股累升唔少，經過調整?家股價係平咗，但係咪超平，就見仁見智啦。
做好準備 輕鬆面對
A股ETF同樣無運行，安碩A50中國(2823) 造9.46元，大跌12%；南方A50(2822) 重創12.5%，造10.82元；追蹤內地創業板指數的南方中創業板(3147) 大跌14%，造8.9元。個市跌得咁緊要，只能用滿目瘡痍去形容，投資有順有逆，投資者喺呢個環境，最重要係睇得開，學毛伯伯話齋，風物長宜放眼量，對於當前投資環境，應該做好最壞準備，謀定後動好啲。
陸羽仁
金融High Tea 舊文
