一周三件：粵置叫糊等爆
■黃小峰任主席的粵海置地，可博盈喜炒轉。 資料圖片
粵海置地（124）今年初獲阿媽以筍價注地產項目，集團本身又揸住深圳布心項目，食住深圳房產熱，單係增值已肥仔。
資產增值夠肥仔
粵置上半年完成購入阿媽粵海控股番禺地產項目，收購價比資產有折讓，嚟緊半年度成績單反映
，食頭啖湯，有盈喜，估計總體稅後溢利1.9億元。呢個項目住宅138萬平方呎，單係上年，同區呎價講緊1,975元。好粗略計以呢個呎價計數，成個項目潛在回籠，都過20億元。粵置潛在變現同日後增值，一樣肥仔。
仲未止，粵置揸咗深圳布心前酒廠土儲，綜合粵置同報章資料，項目會以黃金珠寶做主題，打造包括商業、公寓、酒店同會展嘅綜合體，頭兩期總規模753萬平方呎。諗到係，布心項目以往係以廠房價入賬，隨住土儲value added，加埋好似上周主打花樣年（1777）時講，深圳樓市火爆，再配合前海因素，可以進一步激活成個深圳市等時發展，粵置食住一線城市優勢，布心項目就好值租，另一個肥仔增值，keep住反映。
粵置到上年尾NAV2.53元，現價（2元）折讓得21%，但呢個折讓，係未計上邊兩幅地潛在增值。粵置NAV上到4.5元（相當於布心項目總規劃每方呎增值450蚊），增值78%，得0.44倍PB。
又粵置到上年尾，淨現金38億元，或每股2.22元，係高過現價，而阿媽揸粵置73%，去到貼近爆燈水位。粵置超級現金牛之餘，加埋實力大股東，冇有好怕。冷灶煲粵置，博盈喜炒轉，上番呢期橫頂2.5元計，現價要翻四分一番，到時粵置PB講緊0.55倍，未有耐升過籠。
錢雋
細價股專家
本欄逢周一、三、五刊出
錢雋
一周三件 - 錢雋 舊文
